SLUITERSPOED
’n Mens vergeet sluiterspoed is ook ’n kreatiewe element van fotografie, veral wanneer jy dit stadiger maak.
MENEER BEHEER. ’n Vinnige sluiterspoed gee jou beheer oor ’n bewegende voorwerp wat jy wil afneem – daai springbok wat rondtrippel, pronk en stof skop buite Twee-Rivieren se hek.
Of dalk staan die voorwerp in jou foto stokstil, maar jy is die een wat beweeg – soos wanneer jy ’n kokerboom probeer afneem uit ’n bewegende voertuig in die Richtersveld.
Digitale kameras kan deesdae teen ’n baie hoë ISO (sensorsensitiwiteit) skiet sonder te veel gehalteverlies, wat dit moontlik maak om in byna enige toestand die sluiterspoed te kies wat vinnig genoeg is om die aksie in jou raam te kan vries.
STADIG, NOU. Sluiterspoed het egter ook ’n meer ontspanne kant. Maak jou sluiterspoed stadiger en kreatiewe deure gaan oop.
In Annerie se foto hierbo kry die reëntoneel nou ’n gevoelswaarde. Jy ervaar die beweging van die reëndruppels, wat dit laat uitstaan om die profiel van die boer (haar pa) wat dankie sê vir die reën. Sy het met ISO 800, lensopening van f4 en sluiterspoed van 1/80ste van ’n sekonde geskiet. (Sy het ook ’n flits gebruik, wat op die grond voor haar pa gelê het. Dis hoekom die druppels só skitter, en waar die randbeligting om haar pa se buitelyn vandaan kom.)
KOOP ’N DRIEPOOT. Vir spesiale effekte waar jy jou sluiterspoed baie stadig maak – enigiets van byvoorbeeld 1/30ste van ’ n sekonde tot 30 sekondes (of selfs langer, wanneer jy stersirkels begin afneem) – het jy ’ n stabiele basis nodig. Belê in ’ n goeie driepoot.