MEESTERKLAS
Die voorbladfoto vir hierdie bylaag is geneem deur die landskapfotograaf Jon Kerrin. In hierdie artikel verduidelik hy stap vir stap hoe hy dit geneem het. Slangkop-vuurtoring, Kommetjie, Wes-Kaap, afgeneem deur Jon Kerrin met ’n Fujifilm X-T3kamera en
Só neem Jon Kerrin ’n voorbladfoto
Ek woon in Simonstad en neem oor die afgelope vyf jaar foto’s van die Kaapse Skiereiland. Die Skiereiland is uniek omdat hier só baie pragtige natuurtonele teenaan die woongebiede lê. Omdat ek hier bly, kan ek die landskap in al sy gedaantes afneem, selfs stormweer.
Die natuur bied ontvlugting en vrede, maar ook tye wanneer die weerstoestande jou amper bang maak. Veral wanneer ’n storm die kuslyn tref, kan dit ’n diep indruk op jou maak.
Myns insiens is dít waaroor landskapfotografie gaan: Om nie net af te neem wat my oë sien nie, maar ook om ’n gevoel van grootsheid en bewondering vir die natuur oor te dra.
Ons ervaar die natuur met meer sintuie as bloot sig: Jy ruík die sout seelug, hóór die klotsende water en skreeuende meeue en vóél die wind teen jou gesig.
Dis ’n uitdaging – dalk selfs onmoontlik! – om al hierdie ervarings in die raam van ’n enkele foto vas te lê. Maar as fotograwe is dit iets waarna ons streef.
TOERUSTING
Dis moontlik om goeie landskapfoto’s met eenvoudige toerusting te neem. Die gehalte van ’n foto gaan meer oor die storie wat dit vertel as die tegniese aspekte daarvan.
Die duurste kamera is nie noodwendig die beste een nie. Deur jouself te veel met toerusting te beslommer vergeet jy later van die foto. Dit is wél waar dat gehaltetoerusting jare lank plesier sal verskaf.
Ek het die voorbladfoto geneem met my Fujifilm X-T3- spieëllose kamera. Vir landskapfotografie is dit belangrik dat jy al jou verstellings kan beheer (deur handmodus, oftewel “manual”) en lense kan wissel. Dit beteken dat jy byna enige moderne D-SLR of spieëllose kamera kan gebruik.
Ek het my Fujifilm-wyehoekzoemlens gebruik, die 10-24 mm (16-35 mm-volraamekwivalent). Landskapfotograwe is lief vir ’n wyehoeklens, want dit stel jou in staat om meer van die toneel in te pas.
Wees egter versigtig, want die wyehoek kan ’n voorwerp wat te na aan die kant van die raam is, skeef trek. Sorg dat jou voorwerp (soos die vuurtoring in my geval) na aan die middel van die raam is sodat dit nie onnatuurlik lyk nie.
’n Driepoot is ononderhandelbaar wanneer jy ’n stadige (of lang) sluiterspoed gebruik.
Myne is ’n Leofoto Ranger LS-285C met koolstofveselbene en ’n LH-36-koeëlkop.
Uit jare se ondervinding kan ek sê ’n goeie driepoot moet een van ’n landskapfotograaf se grootste beleggings wees. Weerstoestande is onvoorspelbaar, en jy wil nie sukkel met ’n goedkoop, wankelrige driepoot nie.
Die wind en reën gee nie om of jy ’n amateur of beroepsfotograaf is nie: dit ruk en pluk almal ewe veel! ’n Goedkoop driepoot kan lei tot teleurstellende foto’s wat “sag” in fokus is omdat die wind die driepoot laat beweeg het. ’n Goeie driepoot wat mooi opgepas word, sal jare lank diens doen.
Hierdie foto is redelik tegnies, want ek het ook twee filters gebruik: ’n NiSi 6-stopneutraledigtheids- ( neutral density, ND) en ’n 3-stop- sagte gegradueerde neutraledigtheidsfilter ( soft graduated ND filter).
Dié filters word gebruik om die intensiteit van lig in verskillende dele van die foto te balanseer. Ek wil my beligting oral eweredig hê, en die filters help om die helder lug nie te laat “uitbrand” wanneer ek die baie lang sluiterspoed gebruik nie. Die lang sluiterspoed is noodsaaklik, want dis al manier om die wasige effek in die wolke en water te kry.
Kry egter eers jou kamera onder die knie in “manual mode” voor jy begin sukkel met filters, want anders raak jy dalk net deurmekaar. Dit is ’n ekstra kompleksiteit wat bykom.
VOORBEREIDING
Ek het die Slangkop-vuurtoring by Kommetjie al baiekeer afgeneem – maar dis elke keer anders.
Ek gebruik gratis weervoorspelling-apps en -webwerwe soos windy.com en yr.no sodat ek vooraf weet of daar wind en wolke gaan wees. Die app magicseaweed.com sê weer wat die getye maak, en daaruit kan ek aflei of my voorgrond onder water gaan wees, of nie.
Ek dra altyd ’n handdoek saam om nat toerusting af te vee, en ’n stel warm klere vir wanneer die weer skielik draai. Aan die kus dra ek watertekkies met ’n goeie soolgreep.
As jy voorbereid is, dan hoef jy net te konsentreer op jou kameraverstellings en komposisie wanneer jy op die toneel is.
Dis tog hoekom jy daar is!