GERHARD VAN HELSDINGEN
Nikon D7000 • Sigma 105 mm-lens
GERHARD SKRYF: Ons woon in Vermont, en nadat ons een oggend in Maart misreën gekry het, het ek in die tuin rondgestap op soek na reëndruppels om af te neem.
Ek het dié foto sonder ’n driepoot geneem omdat die blomme te laag op die grond was.
TOAST SÊ: Gerhard se fokusdiepte is vlak in hierdie foto (hy het f5.6 gebruik). Dis gewoonlik wat jy wil hê met ’n foto waar jy een klein detail wil uitlig – die druppeltjie, in dié geval. Die agtergrond en voorgrond is steeds belangrik, want dit dra kleur by wat die oog trek. Daar is ook steeds duidelik sigbare lyne – die kartelings van die blomblare hier voor en na agter – wat die komposisie help versterk.
Gerhard se sluiterspoed was 1/800ste van ’n sekonde, wat gewoonlik vinnig genoeg sal wees om bewegings- blur te voorkom.
Tóg, ’n driepoot dwing jou om stadiger te werk te gaan en dus meer aandag te gee aan als wat jy doen – van ligverstellings tot komposisie.
Onthou altyd dat sluiterspoed, lensopening (f-stop) en ISO ( jou sensor se ligsensitiwiteit) saam werk om die regte beligting te verseker. Verstel aan die een en jy sal aan die ander ook moet verstel. Gehard se ISO hier was 400. Indien hy dit byvoorbeeld 800 gemaak het, sou hy ’n selfs vinniger sluiterspoed kon gebruik.
Maar dit was nie nodig nie, want dis nie ’n aksiefoto nie. En indien hy dalk sy fokusdiepte effens wyer wou maak en byvoorbeeld f8 gebruik het, dan sou hy weer tevrede moet wees met ’n stadiger sluiterspoed, soos 1/400ste van ’n sekonde (teen dieselfde ISO van 400).
Die skerp detail van die vet waterdruppel span hier saam met die helder kleure van die blom vir ’n foto wat dadelik die aandag trek. Ek hou van die eenvoudige komposisie met die druppel wat een derde van links in die raam sit.
Die res van die raam lê wyd oop, en skep die gevoel van ruimte – ’n tuin lekker groot genoeg vir arms swaai.