KATE MORRIS
IG: @kate_l_morris • Canon EOS 7D • Canon 100-400 mm-lens
KATE SKRYF: Ek het ’n paar gevlekte ooruile naby my huis in Somerset-Wes sien nesmaak. Twee kuikens het uitgebroei en later het ek twee opgepofte verebolle gewaar wat Ma en Pa meestal goed uit die oog probeer hou het.
Ek het hulle eers mooi gesien toe hulle groot genoeg was om die nes te verlaat. Dit was pret om te luister hoe hulle vir mekaar roep en sis. Later het hulle van boom tot boom begin beweeg.
’n Paar dae het verbygegaan sonder dat ek hulle gesien het, maar toe loer dié een vir my van agter die takke. Ek’s mal oor die kleurkombinasie van die geel oë en die groen blare.
TOAST SÊ: Wanneer jy voëls van naby afneem – en ander diere – wil jy gewoonlik hê dat hulle vir jou kyk.
Dis soos om ’n portretfoto van ’n mens te neem: oogkontak is belangrik. Die kleur van die oë is treffend, en dis asof die uil skielik ’n persoonlikheid gekry het – nuuskierige agie!
Die op-en-wakker natuurfotograaf sal meer as genoeg vind om af te neem naby sy of haar huis – selfs in ’n skynbaar bedrywige dorp of voorstad. Dikwels is dit die kleiner goedjies soos spinnekoppe en skoenlappers wat jy in die tuin kan afneem, maar soms maak indrukwekkende voëls soos uile hulleself ook tuis.
Dit kan ’n lekker projek word om ’n broeipaar uile se vordering dop te hou en af te neem.
Maar maak altyd eers seker dat jy hulle nie versteur nie – moenie te naby kom nie, en moenie pla waar hulle broei nie. Neem eerder jou foto’s van verder af.