NAZREEN ESSACK

Nikon Z 6ii

Nikon Z 24-200 mm-lens

NAZREEN SKRYF: Hierdie foto is vroegdag geneem in Namibië se Namib-Naukluft- nasionale park. Ek was deel van ’n georganiseerde fotografietoer – Dooievlei was dié oggend in ons visier. Terwyl ons die kameeldoringgeraamtes op die droë pan van Dooievlei afgeneem het, het daar skielik ’n troppie gemsbokke hulle opwagting gemaak.

Hulle het skuins oor die duine beweeg en ek het hierdie een afgeneem net toe hy die kruin bereik. My verstellings was: sluiterspoed van 1/1 000ste van ’n sekonde, lensopening f6.3 en ISO 200.

TOAST SÊ: Dooievlei (digby Sossusvlei) is een van Namibië se gewildste bestemmings vir fotograwe danksy die anderwêreldse landskapfoto’s wat jy van die dooie bome kan neem. Die bome is gelukkig altyd daar; dus moet jy net jou tyd reg kies (vroegdag en laatmiddag) om ’n treffende foto te neem.

Maar gemsbokke is gedurig aan die beweeg, en word eintlik selde in Dooievlei gewaar.

Om ’n gemsbok teen ’n rooi Namibduin af te neem is beslis een van daai foto’s wat op elke ernstige fotograaf se lysie sal wees op ’n besoek aan Namibië.

Nazreen was dus gelukkig – maar sy was ook gereed. Hierdie puik foto werk danksy die silhoeët van die gemsbok wat versterk word deur die diagonale lyn wat die kruin van die duin deur die raam trek.

Onthou, wanneer jy ’n silhoeëtfoto neem, moet dit duidelik wees – deur slegs na die buitelyne te kyk – watter dier jy afgeneem het. Nazreen se gemsbok is so duidelik soos daglig omdat elke been afsonderlik uitstaan, die kop in ’n goeie posisie is en natuurlik is daai horings onmiskenbaar! >