Doen dié 7 dinge
1 Stap na ’n waterval
Sabie is net mooi waar die Hoëveld al langs die Drakensbergse platorand skerp na die Laeveld daal. Dié eskarp en die hoë reënval sorg vir ’n rits watervalle. Daar is vier watervalle rondom Sabie.
Die Sabie-waterval is net anderkant die brug wat jou oor die Sabierivier neem, nes jy uit die dorp ry Graskop toe. Hier is drie uitkykpunte bo die waterval.
Koste Los asseblief ’n skenking.
Hier is drie watervalle langs die Ou Lydenburgpad buite die dorp. Wees versigtig as jy hierdie pad ry: Hier is talle slaggate, sommige so groot jy moet byna lángs die pad ry, maar as jy dit stadig vat, kan jy met ’n sedan by elke waterval uitkom.
Die naaste een is Bridal Veil-waterval, 6,5 km buite die dorp. ’n Sytak van die Sabierivier val soos ’n bruid se sluier sagkens na onder.
In die parkeerterrein kan jy ’n mooi lap, kunswerk of ’n plant koop. Jy moet sowat 500 m opdraande loop om by die waterval uit te kom. Die Loerie-sirkelroete (5,5 km) begin ook by die parkeerterrein en neem jou hoër in die woude en plantasies bo die waterval. Koste R20 p.p. om die waterval te besoek. R45 p.p. vir die staproete. Jy moet met ’n kaart betaal.
Kontak 083 677 0904; csieling@safcol.co.za
Die Lone Creek-waterval is 8,8 km buite die dorp. Teen 68 m is dit die hoogste. Hier’s opknapwerk in 2019 gedoen om dinge netjieser en veiliger te maak: Heinings wat besoekers keer om in die poel te swem en ’n massiewe houtraam vir foto’s is opgerig. Ongelukkig neem die strukture ’n bietjie die plek oor.
Die waterval is na aan die parkeerterrein, en hier is ook kunsstalletjies.
Koste R45 p.p.
Kontak 083 677 0904; csieling@safcol.co.za
Al is die Horse Shoe-waterval die verste (10 km) en die kleinste, is dit my gunsteling. Die rotse verdeel die waterval in twee wat dit laat lyk soos ’n perdeskoen wat onderstebo hang. Dit word privaat bestuur en jy kan met jou kaal voete in die poel staan.
Koste R20 p.p.
Kontak 078 127 2005
Lus vir nóg watervalle? Hier is nóg vyf rondom Graskop net sowat 20 km verder: Mac-Mac-, Maria Shires-, Forest Falls-, Lisbon- en Berlyn-waterval.
2 Boeke, boeke, boeke
Bestel koffie en wortelkoek en snuffel deur Tiger Goss se 40 000 boeke by The Bookman’s Corner. Ek het die bekende fotograaf Obie Oberholzer se koffietafelboek, Southern Circle, vir net R80 aangeskaf.
Waar? H.v. 6de Laan en Hoofstraat
Kontak 083 467 6307
3 Vat die pad op ’n perd
Hier’s twee plekke wat perdry-uitstappies aanbied. Coopers Creek het ’n hippie-atmosfeer en fokus op die rehabilitasie van perde, perdrylesse en -ritte. Die aktiwiteite genereer die nodige inkomste om die diere te versorg. River Stables is luuks – hulle bied ook lesse en ritte; perdepieknieks, en stalle te huur, asook fênsie blyplek (sien Bly hier op bl. 101).
Waar? Coopers Creek is 5 km buite die dorp via die Ou Lydenburgpad, naby die Ceylon-hut.
Koste Vanaf R350 p.p. vir ’n uur
Kontak cooperscreek.org; 071 897 8572
4 Vang (en braai) forel
Jy en die jongspan kan kom lyn natmaak by Horseshoe Trout & About. Jy hoef nie toerusting of ervaring te hê nie – hier is visstokke te huur én hulle maak die forel vir jou skoon. Jy kan ook ’n lapa of piekniekplek langs een van die twee damme huur en jou vis langs die water braai.
Oop Wo. tot Ma. van 8 vm.-4.30 nm. Gesluit op Dinsdae. Waar? 10 km buite die dorp op die Ou Lydenburgpad. Koste Toegang: R100 p.p. (R50 per kind) en vanaf R30 per stok. Forel kos R179 per kg. Skoonmaak: R5 per vis. Lapa: R350 p.n. (eetgerei kan voorsien word).
Kontak Bespreek vooraf 084 531 3376 / 083 780 0250 (WhatsApp); Facebook: Horseshoe Trout&About Sabie
5 Laat jou hart bons
Kestell Adventures bied al 14 jaar lank avonture rondom Sabie aan. Spartel deur die rivier se stroomversnellings op ’n Gecko (’n soort binneband), klouter af by ’n waterval met ’n tou, verken ’n grot of ry ’n 4x4roete deur die woude na ’n geheime waterval.
Waar? Die R536
Koste Gecko-rit: R590 p.p.
Kontak kestelladventures.com;
6 Klop aan by ’n ysterperd-akademie
Die bergpasse van die Panoramaroete is gewild onder motorfietsryers... Kan jy nie motorfietsry nie? Die Sabie Valley Riders Academy kan jou touwys maak. Hulle bied motorfietstoere en -kursusse op teer, grond en sand. Jy kan ook motorfietse by hulle huur en op jou eie avontuur gaan.
Waar? Hoofstraat 53
Koste Vanaf R1 950 p.p. vir ’n eendagkursus vir beginners (eie fiets).
Kontak rideracademy.co.za;
7 Voetslaan op die Fanie
Die legendariese Fanie Botha-staproete, wat in 1973 gestig is, begin op Sabie en eindig 75 km en 5 dae later op Graskop. Klink dit te taai? Jy kan ook ’n korter roetes aanpak, soos ’n sirkelroete van 32 km wat by die Ceylonhut, sowat 5 km buite Sabie begin.
Koste R203 p.p.p.d.
Kontak 083 677 0904;
csieling@safcol.co.za
Bookings, Tours &
Info Office is ’n private toerismekantoor vir akkommodasie en aktiwiteite in die omgewing. Jy kan ’n perdekartoer bespreek of ’n fiets huur.
Waar? Op die hoek van Louis Trichardtstraat en Hoofstraat (tussen Patena Pancakes en Sabie Brewing Company)
Kontak 082 836 7360; mysabieinfo.co.za; carriage.co.za; Facebook: Bookings, Tours & Info Office Sabie