Pasop vir KZN Wildlife se Drakensberg-kaarte
Ek verwys na Grant Christie se uitstekende artikel oor sy vyf dae lange stap in die Maloti-Drakensbergpark, “Laat die berge jou betower”, in Weg # 212. Ek was verontrus om te sien dat die stapkaarte van Ezemvelo KZN Wildlife (EKZNW) se uKhahlamba Drakensberg Park-reeks, Hiking Map No. 1 Royal Natal (Rugged Glen–Mnweni) en Hiking Map No. 2 Cathedral Peak (Culfargie–Monks Cowl) benewens Slingsby se Drakensberg North- kaart aanbeveel word.
Ek was tydens 2021 tot 2023 betrokke by die oorteken en uitgee van nuwe Drakensberg-kaarte, in samewerking met EKZNW – waarvan Slingsby Drakensberg North die eerste een was. Central en South word ook reeds gedruk.
Daartydens het ek en die ander navorsers agtergekom dat die ou kaartreeks twee verskillende en teenstrydige kaartafbeeldings gebruik. Dit het veroorsaak dat die meeste paadjies 500 m oos of wes van die ware ligging aangedui word. Ek het skielik verstaan hoekom soveel geharde stappers en klimmers oor die kaarte gekla het.
Daarby is dié EKZNW-kaarte 20 jaar gelede hersien, en word verskeie paadjies en roetes wat al verdwyn, weggespoel of deur die park gesluit is, steeds aangedui. Die ganse Mnweni-gebied, byvoorbeeld, is heeltemal verkeerd op daardie kaarte. Dis gevaarlik om die kaarte te gebruik, veral in mistige, reënerige toestande. Dié foute en gevare is aan Ezemvelo Wildlife deurgegee.
Groentjie-stappers in die Drakensberg sal onbewus wees van die gevare wanneer hulle die kaarte koop. Dis onverantwoordelik van enige party om die kaarte steeds te verkoop.