Doen dié 5 dinge
1 Stap die Towersig-roete
Hierdie is een van die mees toeganklike roetes op die dorp met opsies vir elke fiksheidvlak van 2,7 km tot 12 km. Die roete neem jou op teen die koppies wat jou ’n onverbeterlike uitsig oor die dorp en die KleinSwartberg gee. Kyk of jy die ‘eland’ in Elandsberg reg agter die dorp kan sien. As jy suid kyk, kan jy ook doer in die verte die agterkant van die Slapende Skoonheid bo Riversdal in die berge sien lê.
Waar? Volg die bordjies oorkant die toerismekantoor in Kerkstraat. Die roete begin aan die bokant van Hospitaalstraat waar jy kan parkeer.
Koste Die roetes is gratis, maar skenkings vir die instandhouding is welkom.
Kaart? Kry een by die toerismekantoor of kyk by
towerkopinfo.co.za/Traverse-etc/
Kontak 028 050 0158; 073 036 0255
Wat nog? Hugh Sussen en Ladismith-toerisme hou die roete in stand. Hugh is ’n waardevolle bron van inligting rondom staproetes, diere en plante in die omgewing. Volg sy iNaturalist-profiel, asook díe van Ladismith-toerisme. inaturalist.org/people/hugh1 inaturalist.org/people/ladismith-tourism
2 Systap Stanley na ’n waterval toe
Die bekende Stanley se Liggie skyn steeds elke aand van die hange van Elandsberg af. Stanley de Wit het die eerste liggie in 1963 opgerig met ’n vindingryke kontrepsie wat krag met water opwek.
Gemeenskapslede hou die lig in stand, maar die voetpaadjie soontoe is soms erg toegegroei en verspoel. Doen eers navraag by die toerismeburo voordat jy die roete aanpak – dit kan tot 10 ure neem om die 13 km lange roete te voltooi.
Aan die begin van dié roete (dis gratis) is ’n kloof wat wel meestal toeganklik is, afhangende van die watervlak. Volg Noordstraat noord uit die dorp uit. Draai na sowat 3 km links by die Stanley se Liggiebordjie. Voertuie met ’n hoë grondvryhoogte kan inry en by die laaste hek parkeer. Dis omtrent 1 km tot by die parkeerplek. As jy ’n plat Polo het, sal jy die kilometer moet stap tot by die begin van die kloof. Stap 700 m verder in die kloof op en volg die oranje kolle tot by die waterval. Klim in die poel en geniet!
3 Verken grondpadhemel
Hulle sê die pad hemel toe is ’n grondpad deur die Klein-Karoo. Hier kan jy jou dae lank besig hou met daguitstappies en sirkelroetes in ’n motor, op ’n fiets of motorfiets. Hier’s ’n paar gunstelinge:
Mense kom van heinde en ver om die Seweweekspoort-grondpadpas van sowat 17 km deur die Swartberg te ry. ’n Heerlike daguitstappie is dié sirkelroete rondom die Klein-Swartberg: Ry wes uit die dorp met Van Riebeeckstraat in die rigting van Laingsburg op die R323. Draai regs op die teerpad by die T-aansluiting en ry agter die berg deur die Vleiland-, Middelplaas- en Hartlandomgewing. Draai regs deur die Seweweekspoort. Kom terug via Hoeko tot weer op Ladismith. Dis sowat 180 km.
Ry Gamkapoortdam toe via Bosluiskloof, ’n uiten-tuisroete van sowat 130 km.
Ry ’n sirkelroete van Ladismith na Van
Wyksdorp en dan met die Rooibergpas na
Calitzdorp – dis sowat 215 km.
4 Klim op jou bergfiets
Die Seweweekspoortpas is op elke bergfietsryer se emmerskoplys. Wenk: Dis afdraande as jy dit van noord na suid aanpak.
Avonturiers wat op Seweweekspoort wil konsentreer, kan aanklop by Mark en Colleen le Roux in die Opsoekvallei naby die poort. Mark is bekend in fietsrykringe en gee graag raad en kan vir jou ’n toer saamstel.
Hy kan ook reël dat ’n taxi julle by die bopunt van Seweweekspoort aflaai. Geharde ryers sal hou van die roetes op hulle Le Karoux-gasteplaas. colleen@bigshotmedia.co.za; 083 449 4323
Hier’s verskeie grondpad-bergfietsroetes deur Hoeko, Dwarsrivier, Voorbaat, Buffelsdrif, Plathuis via Prinspoort en nog wat. Die beste plek om by aan te klop, is Makadas Adventures, die skeppers van die Klein Karoo Gravel Corridor. Op die webwerf kry jy roetekaarte en verblyfopsies. Jy kan omtrent heelpad grondpad ry van Montagu tot op Prins Albert. makadasadventures.co.za; 083 312 7271 (Mitzi)
Jan Ellis neem mense op fietsryroetes. Hy hou daarvan om diep in die boendoes te wees. Hy maak ook fietse reg. Volg sy avonture op sy facebookblad @ fatbikewest outventures; 074 233 6691
Vyversrus-plaas se 6 000 ha sluit die Naauwkloofreservaat in. Hier is dae se paaie waar jy kan fietsry, stap of 4x4 ry. Dis gratis vir gaste. Dagbesoekers betaal R50 p.p. en R350 vir die 4x4-roete.
vyversrus.business.site; 084 701 0370
5 Verken die Klein-Swartberg se pieke
Die Klein-Swartberg is die kortste deel van die Swartbergreeks, maar het ses van die agt hoogste pieke in die Wes-Kaap!
Seweweekspoortpiek (2 325 m) is die hoogste, maar Towerkop (2 189 m) moenie onderskat word nie. Die uitdagende roetes na die twee pieke sowel as die Swartberg Traverse loop oor private grond. Die plaaslike klimmer Jan Viljoen bestuur die toegang tot die roetes namens die Bergklub van Suid-Afrika.
Hulle probeer dit veilig en skoon hou en sorg dat die berg en omliggende landskap nie vertrap word nie. Die aantal stappers word streng beheer – doen vooraf navraag. Daar moet verkieslik ’n lid van die Bergklub saamstap.
Stappers kan tot aan die basis van die torings op Towerkop klim en in ’n grot oornag. Slegs ervare rotsklimmers kan dit tot heel bo-op die twee torings waag.
towerkopinfo.co.za