WAT SÊ DIE MENSE?
Sally Andrew, skrywer van die Tannie Maria-boeke
“Ek woon al 12 jaar in ’n natuurreservaat in die Karoo. Ons is dol op die doringbome, die oeroue ghwarries, die rotsagtige rooi hange van die berge, die lied van die bokmakierie, die luiperd se spoor in die sand, en elke aand se verskillende roesblou sonsondergange. Die nagte is vreedsaam en stikdonker, behalwe vir die helder see van sterre. Die mense is vriendelik en alles beweeg teen ’n gawe pas. Die argitektuur is uiteenlopend en die dorp het oulike winkels en plekke om te eet.”
EET HIER
GYPSY’S GIN BAR | BISTRO | DELI
Die streek se grootste verskeidenheid jenewerprodukte word hier aangehou. Jy gaan lank by Letitia vashaak as jy eers begin snuif en proe. Masood maak Indiese kerries wat jou tong laat sing. Hier’s ook pizzas en visvingers vir dié met ’n minder waaghalsige palet.
Waar? Suidstraat 12
Oop Elke dag van 8 vm. tot 9 nm. gypsys.co.za; 060 690 3902
DIE KANNA KOMBUIS
Heerlike ontbyt en middagetes en Sondae ’n lekker bord huiskos (herderspastei, lamsboud, mielietert…). Vra watter varsgebakte koeke of terte beskikbaar is. Hier is altyd iets vir die suikertand (Oreo-moussetert!) en speelplek vir die kinders op ’n ou trok.
Waar? Albertstraat 55
Oop Ma., Di., Do.: 8 vm. tot 5 nm.; Wo., Vr., Sa. tot 8 nm.; So. tot 2 nm.
082 831 9987
TOWERKOP COFFEE SHOP
In die knus kuiertuin agter die ou poskantoor kan jy aansit vir ’n groot ontbyt en smaaklike middagetes.
Dis ook ’n goeie keuse vir mense met vegetariese, veganistiese of ander dieetvoorkeure.
Waar? Queenstraat 43
Oop Weeksdae van 8 vm. tot 4 nm. Sa.: tot 3 nm.
066 445 8589
DWARS BAR
Dié gesellige restaurant en kroeg het mooi uitsigte oor Towerkop. Hier’s allerlei heerlike burgers, maar die gunsteling bly die koedoeburger. Hier is ook kampplek (slegs tente) en gastekamers – ongelukkig geen kinders jonger as 12 jaar oud nie.
Waar? Koedoeskloof is sowat 11 km wes van Ladismith langs die R323.
Oop Dis altyd oop vir oornaggaste, en op Vrydagaande vir lede van die publiek vanaf 6 nm. Jy moet 24 uur vooruit bespreek. Groter groepe kan op ander aande ook bespreek. koedoeskloof.co.za
083 327 9683
HILLOCK WINES RESTAURANT
Proe wyn en kom sit aan tussen die wingerde op Mymering. Oop vir ontbyt, ligte middagetes en bederfaandetes. Besprekings noodsaaklik. Aandetes is ’n driegangete vanaf R400 p.p.
Waar? Die plaas is sowat 12 km wes Ladismith in die Dwarsriviervallei.
Oop Ontbyt tot 10 vm.; Ligte middagetes van 12 nm. tot 3 nm.; Aandete 6:30 nm. vaste driegangmaaltyd (bespreek ’n dag vooruit)
mymering.com; 028 551 1548
BLY HIER
PARKSIDE GUEST HOUSE
Die netjiese ses dubbelkamers wat rondom die swembad gebou is, is lekker vir ’n groep vriende.
Waar? Frans Visagie-singel 10 Koste Vanaf R1 200 per kamer. Aandete vanaf R200 p.p. vir ’n tweegangmaaltyd.
083 692 0803
OAKSREST
Die vier kampplekke op die oewer van ’n swemdam – bring die kinders se tjoepie en vlerkies – het gras en skaduwee. Elke kampplek het krag en braaiplek en hier’s ’n gemeenskaplike ablusie, met ’n wasmasjien, tuimeldroër en yskas.
Hier is ook ’n ruim plaashuis vir groot groepe, asook twee selfsorgkothuise. Verken die plaas met jou stapstewels of bergfiets.
Waar? Sowat 11 km wes van Ladismith. Jy draai van die R323 af.
Koste Kamp: vanaf R200 p.p. (slaapplek vir vier). Selfsorg: vanaf R750 p.p. (slaapplek vir twee, agt of nege mense).
oaksrest.com; 028 551 2027
TOUCH OF PLAAS
Die basiese kampplekke het elk ’n badkamer, maar deel wel braaigeriewe. Jy kan krag koop.
Besoekers kan in die herfs olywe oes. Jy kan ook kaas- en olyfborde, varsgebakte brood en ander plaasen olyfprodukte bestel.
Waar? Sowat 14 km buite Ladismith langs die R323.
Koste Vanaf R200 p.p. atouchofplaas.co.za
072 407 1731
VYVERSRUS
Hier boer hulle met stilte en kilometers grondpaaie wat verken moet word. Die drie selfsorghuisies is langs die dam.
Sit op die stoep en kyk vir die berg en die diere (gemsbok,
kameelperd, goue wildebees, koedoe, sebra...) of stap, ry fiets of kerjakker met jou 4x4.
Waar? Sowat 17 km suidwes van Ladismith langs die R323.
Koste Vanaf R1 200 p.n. vir 7 mense. vyversrus.business.site
084 701 0370
MYMERING
Hier’s verskeie luukse huisies en selfsorgeenhede, elk met ’n plonspoel en uitsigte oor die wingerde en die Klein-Swartberg
Kom stap saam met ’n gids op die plaas.
Waar? Sowat 12 km wes van Ladismith langs die R323.
Koste Vanaf R1 000 p.n. vir twee (slaapplek vir twee of vier mense)
mymering.com; 028 551 1548
THE COUNTRY GARDEN / BEECATCHER GUEST FARM
Die vier selfsorghuisies lê weggesteek aan die voet van die KleinSwartberg in die Voorbaat-vallei.
Dis pure plaas, afgeleë met ver paadjies vir fietsryers en stappers. Hier’s ook die Manor House met slaapplek vir tien mense.
Waar? 25 km wes van Ladismith. Jy draai van die R323 af na die plaasgemeenskap van Voorbaat.
Koste Selfsorghuis: vanaf R800 p.n. vir twee (slaapplek vir 3 tot 6 mense). Manor House: R3 000 p.n. vir tien mense. thecountrygarden.co.za
023 111 0133
076 591 7829 (WhatsApp)
PRINSPOORT
Dis ’n entjie uit Ladismith, maar hier word jy in luuksheid gebaai – van oorvloedige stilte en elektriese komberse in die winter tot plonspoele en lugreling in die somer. Die Prinspoort-plaashuis is groot genoeg vir agt mense en die twee kleiner selfsorgkothuise vir vier mense.
Elke huis het braaigeriewe, en as jy te lui voel, bestel ’n onvergeetlike maaltyd by jou gasvrou, Lianda. Verken die plaas se eindelose paadjies te voet, op jou fiets of met jou 4x4. Jy kan ook ’n piekniekmandjie bestel.
Waar? Sowat 45 km suidwes van Ladismith in die rigting van die Anysberg-natuurreservaat.
Koste Kothuise: R1 400 p.n. Plaashuis: R1 560 p.n. Die pryse geld as jy direk bespreek. prinspoortkleinkaroostay.co.za 082 948 2450
Weg- lesers kan 15%-afslag op verblyf op Prinspoort kry tot 8 Desember 2024. Sluit die kode “Weg/go” in met bespreking.
WAT NOG?
Besoek die sendingdorpies van Zoar en Amalienstein langs die R62. Hier is ’n ryk geskiedenis – loer gerus in by Amalienstein se Lutherse kerk. In die berge is vele rotskuns met onder meer tekeninge van meerminne. Vir ’n begeleide kulturele toer van die dorpies en/of Seweweekspoort, kontak Alistair Reizenberg 079 222 4473.
Junie en Julie is aalwyntyd en die heuwels staan dan bont van oranje blomme. En in die lente steek allerlei veldblomme en vygies kop uit. ’n Hele paar biome kom rondom Ladismith byeen; dus is hier ’n verbasend groot verskeidenheid voëls. Bekyk die volledige spesieslys op
ladismithtourismbureau.co.za/ladismith-birds. Hier word ook gereeld voëluitstappies gehou – doen navraag by die toerismeburo.
Die toerismekantoor is in die historiese ou Otto Hager-kerk en museum in Suidstraat 6 waar Hettie Weymar of Jenni Sharky diens doen.
ladismithtourismbureau.co.za; 028 0500158; 073 036 0255
VIR JOU DAGBOEK
26 April-5 Mei Ladismith Endemic Birding Bash. Kom merk soveel voëls moontlik af in dié week en help sodoende om die streek se voëllys uit te brei. Kontak die toerismeburo.
26-28 April Kom ry, kuier en kamp saam met ander ysterperdentoesiaste. karoo62.com/event/harleyburn2024/
28 September 2024 Begin solank oefen vir Ladismith Cheese se Seweweekspoort-bergfiets- en veldwedrenresies.
7weekspoortchallenge.co.za