‘NDAKASOTWA NECHIPFEKO ’
◆ sat i ava nemwana nemurume waanaye. Ari kufamba kumaporofita nekudzin’anga achiudzwa kuti ndini ndakamubira chipfeko chake ndikamugadzira kuti asaite mwana. Ngaaende kuchipatara anovhenekwa!”
Mukadzi uyu paaitaura izvi airasa mawoko achiti anoda kupedzerana naChikoka.
Anotizve akatanga kugara kuCalidonia muna 2004 uye anoziva kuti murume akaroora Chikoka pari zvino aive nemudzimai wekutanga uyo waakasiya achirwara kusvikira azofa.
“Chikoka akatanga kudanana nemurume wangu paaigara kuTafara ini ndichigara muCalidonia. Aibika sadza pedyo nekambani yaishandira murume wangu, ndiko kwavakadanana kusvika ini ndasarudza kusiyana nemurume uyu ndikaroorwa futi zvangu.
“Panyaya iyi tinoda umboo hwakakwana nekuti kana pasina umboo hwemachiremba nemapositori acho ndichada kuripwa nekuti handikodzeri kuvingwa nevanhu vemapepanhau pamba pangu ndichibvunzwa zvakadai.
“Ehe, kudanana nevarume vevanhu kwakashata nekuti muno vanhu vapera nerukawo. Kune mumwe mudzimai muno akaita mazuva matatu afira mumba asotwa nerukawo. Ini kutora chipfeko chake chemukati handina uye handina kumbomutyisidzira. Asi nhasi ndichamugadzirisa vemapepanhau vawane nyaya chaidzo,” akadaro Mupoperi achipupa nehasha. Mai Ethel Mupoperi, avo vanozviti ndivo amai vaMupoperi, vanoshora Chikoka vachiti ndiye akaputsa wanano yemwana wavo.
“Munyaradzi akange akaroorwa zvakanaka tikabvisirwa mombe yechimanda neroora rose nemurume wake wekutanga. Zvinotirwadza kuti munhu akaparadza wanano yake ndiye achiri kuramba achiuya achinetsana naye,” vanodaro.
Mupoperi anonzi akazoenda kumba kwaChikoka kunoita mhirizhonga apo akapedza kuita hurukuro neKwayedza nemusi weChitatu svondo rapera.
Pembele anotsinhira kuti Mupoperi akaenda kumba kwavo ndokusiya avatukirira.
“Zvakaoma, vauya vakatishura vachiti ndivo vakatora chipfeko chemudzimai wangu. Vatosiya vativimbisa kuti tichafuma tisina nhengo dzedu dzakavandika,” anodaro.
Mupoperi akazoshanyirawo mahofisi eKwayedza nemusi weChina svondo rapera achida kuona mupepeti apo aiti aida kuvharisa nyaya iyi.
Mudzimai uyu akati nyaya iyi inomubvusa chimiro paruzhinji kana ikabuda mubepanhau.
“Ndauya kuzokuudzai kuti yangu nyaya haisi kuzobuda, handidi izvozvo,” akadaro Mupoperi achitoganza.
Zvisinei, mupepeti weKwayedza Patrick Shamba akaudza Mupoperi kuti iye akasununguka kupa divi rake panyaya iyi, izvo ainge aita, asi hapana mumwe munhu anomisa kuti nyaya isabude mubepanhau iri kunze kwake.
Mushure mekunge Mupoperi audzwa kuti nyaya iyi iri kuzobuda uye aziviswa kuti akange achitorwa mifananidzo paaive muhofisi yaShamba, akazobuda ari chahwiriri achitiza.
“Saka chingoitai zvamunenge maita. Asi kana nyaya iyi ikabuda chete tichafamba nawo mapepanhau acho kusvikira zvakanaka,” anodaro Mupoperi achibuda.
Zvakadai, vangada kubatsira Chikoka vanogona kumubata panhare dzinoti 0736 599 021.
Vachitaura nezviri kuitika kuna Chikoka, mutungamiriri wesangano reZinatha, VaGeorge Kandiero, vanoti mukadzi uyu anogona kubatsirwa kuchivanhu.
“Akasununguka kushanyira mahofisi edu atsvagirwe nyanzvi dzinokwanisa kumubatsira kuti ayambuke padambudziko rake iri,” vanodaro.