Shupa yemwana pachiNdau
NDAUWE ndauwe! Teiti nemazhinji hawo nechiaranga chezuwa chino. Gore rino ngatimboti iriyohe mvura. Amuchizwi ere chidziisira chezuwa muna Chikunguru muno.
Tinogonda kuti Marure uchatirerusira pamvurepo. Ngatinasirire yaemho kumunda, kupishe mawiwi nekuronge marozhi. Nyamashi uno tinode kureketa ngeshupa yemwana. Ndicho Chindau chedu chechikare.
Nyamashi uno apana uchareketa ngeshupa yemwana. Ndumure dzeeshe dzaberekwa nyamashi ndeikumanidza nani dzangu ndumure, apana achachiziya chirocho. Makarekare edu aigwinyisa yaemho eithairire hosha idzi dzemunoona dzati nenyika yeeshe tukutuku kunga mashamba.
Nguruwe dzacho dziri pari dzingaarya dzikaapedza mashambewo.
Shupa yemwana ipharichi raibikirwe ndumure kazhinji kacho raiizwa ngeufu hwemungoza, mafunde nemhunga. Tisaireketa ngeufu hwemagwere teibhuya ngeshupa yemwana zviyana. Ufu uhwu hwainyikwa hwobekwe mudende atei mangwani wacho. Mudende umu mwaikone kuiswe mutombo wekuti bota iri robikwa zviyana rizorungura uyehe waidetsere kuti mwana asaite manyoka neimweni mikhuhlani yetisikazii akadi.
Mutombo waibekwe umu mudende waiya kazhinji kacho nzinde dzemundurungwa. Zvochiti zhau kudai, apa atireketi ngetshokera papharichi iri reshupa. Akuna chi- rocho chetshokera. Zvetshokera zvaa zvemazuwa ano. Mwakazomboone peyakanakira ere tshokera yacho?
Hosha dzetshokera nyamashi uno dzati tukutuku kunga tsanza yetinoone mutsanza mwaBiriiri. Ndiyo yataa muroi tshokera ino nyamashi, kundopumhana kubaandopumhana hedu. Anhu ekare airarame ndaramo yakamhoryoka kubudikidza ngekurye mabota ano echianhu etinoreketa ndiwo teikumanidzahe nemiriwo yawo yechibarirwe yakadai ngegusha, guku, mutsuutsungu, mutikiti, ishwa, magwamba, nyenze, ishwa, nhanzva nemuderya.
Ngatiendere mberi nekurye kurya kwedu kwakamhoryoka kwetakakura nakwo munaraunda mwedu kunokumanidze sadza nebota remungoza, mhunga nemafunde.
◆ Pane angade kureketa naPenyai ngatidhibhane 0772 332 264, 0712 948 959.