‘MURUME WAKO NDINI NDINAYE’
MUMWE mudzimai anoti mukadzi ari kudanana nemurume wake waakachata naye ari kumutambudza nekumufonera achimusvotesa uye nekudzinga vana vake pamba pamadiro zvekuti iye ndiye ave kutoita seshamwarikadzi.
Annie Muchinchwa akamhan’arira Shylene Muchena kuHarare Civil Court achida kuti amiswe kumufonera, kumutuka nekudzinga vana vake pamba.
“Anouya kumba kwangu ndisipo odzinga vana vangu mumba, iye osara akazvivharira mubhedhurumu mangu nemurume wange. Hameno kuti vanenge vachiitei,” anodaro Muchinchwa.
Anoenderera mberi achiti Muchena anomufonera kana kumutumira mameseji achimuzivisa kuti anenge aine murume wake.
“Ndinoshanda kwaMutare, saka anofona kana kunditumira mameseji achindiudza kuti ndiye ane murume kana zvavanenge vachiita uye kwavanenge vari kuti ndirwadziwe,” anodaro.
Anoti ndiye ava kuitwa kunge shamwarikadzi asi ari iye muridzi wemurume.
“Ndakachata nemurume wangu asi ndini ndava kuitwa kunge shamwarikadzi yake,” anodaro Muchinchwa.
Muchena anoti murume waMuchinchwa ndiye ari kuramba achimunetsa kunyangwe zvazvo vakarambana.
“Ndakaenda kumba kwake kamwe chete mushure mekunge murume wake auya kumba kwangu achindinyengerera kuti tidzokerane.
“Handina kudzinga vana, murume wake ndiye akavadzinga achiti anoda kunyatsotaura neni sezvo kumba kwangu ndaiva ndasiya mumwe murume. Hatina zvatakaita kana kumbopedza nguva tirimo, takazorara kubhawa,” anodaro Muchena.
Anoti murume waakasiya kumba kwake ndiye akatanga kufonera nekutumira Muchinchwa mameseji achimuudza kwakanga kuine murume wake.
“Ndakakanganwa foni kumba, zvino murume wandakasiya mumba mangu ndiye akatanga kushandisa foni yangu kutaura naye achiita kunge ini nekuti akanga atsamwa kuti ndatorwa nemumwe murume ,” anodaro Muchena.
Anoti izuva rimwe chete raakafonera Muchinchwa.
“Ndakamufonera kamwe chete ndichida kumuudza kuti murume wake ane imwe shamwarikadzi nekuti ndaisada kuti afunge kuti ndini ndinenge ndinaye mazuva ese,” anodaro Muchena.
Mutongi Noah Gwatidzo akapa Muchinchwa gwaro rerunyaro.