Oshungurudza amai shirikadzi

Kwayedza - - Nhau Dzemuno - Gamuchirai Muzanenhamu

MUDZIMAI wekuWarren Park, muHarare, akaendesa mwanakomana wake kudare achiti ari kumushungurudza nekukiya dzimba dzemaroja pamwe nekuvadzinga pamba izvo zvave kuita kuti ashaye mari.

Vaida Bvunzawabaya akamhan’arira Shack Bvunzawabaya kuHarare Civil Court.

“Mwana uyu anditambudza, apa ndiye mukuru. Anopota achikiya dzimba oisa hembe dzake achidzinga maroja kana ndaenda kumusha kwandava kugara kubva zvakashaya baba vake,” anodaro.

Anoenderera mberi achiti Shack ari kumutuka achiti haafarire mukadzi wake.

“Anondituka achiti handidi mukadzi wake, saka iye sedangwe ndiye anofanirwa kuona zvepamba apa ini ndoenda kumusha kuti ndisanetsane nemukadzi wake. Asi iye ane imba yake yaari kusiya achizogara kumba kwaanoziva kuti ndinenge ndichida mari yemaroja,” anodaro Vaida.

Shack anoti haanetsane naamai vake asi kuti sedangwe, anoda kubatanidza mhuri saka kana vachinge vakapesana mafungiro, amai vake vanoti vari kuvatuka.

“Handisi kunetsana navo asi sedangwe rakasiiwa nababa ndichinzi ndichengete mhuri, ndiri kuedza kubatanidza mhuri nekuti mune makakatanwa akawanda. Zvino ndikapesana mafungiro naamai vanoti ndiri kuvatuka.

“Maroja avari kuti ndakadzinga vakange vasisabhadhare mari ndikavati vabude asi amai vave kuona sekunge ndakaita zvekuvarwadzisa kuti vasawane mari,” anodaro Shack.

Anoenderera mberi achiti amai vake vakamuudza kuti mukadzi wake haadi zvekuenda kurufu navo nekudaro havamufarire.

“Vari kuti ndakavati havadi mukadzi wangu asi ndivo vakandiudza kuti havamude nekuti haadi kuenda kunhamo navo,” anodaro.

Mutongi Noah Gwatidzo akapa Vaida gwaro redziviriro.

Newspapers in English

Newspapers from Zimbabwe

© PressReader. All rights reserved.