Makambani 43 ovandudzwa
CHIRONGWA cheHurumende chekuvandudza makambani 43 ari pasi payo chave padanho repamusoro uye nemusi weChipiri svondo rino dare reCabinet rakaita chisungo chekuti svondo rinouya ritange kugamuchira nekuongorora magwaro emamwe emakambani aya.
Pachagara dare reCabinet svondo roga-roga, richaongorora magwaro emakambani maviri uye richatanga nekuongorora eZISCO neChemplex Corporation nemusi weChipiri svondo rinouya.
Vachitaura kuvatori venhau nemusi weChipiri mushure memusangano weCabinet, vakafanobata chigaro chegurukota rezvekuburitswa kwemashoko nenhepfenyuro, VaMangaliso Ndlovu, vanoti hapana kudzokera shure nechirongwa chekuvandudzwa kwemakambani ari pasi peHurumende.
“Cabinet yakazeya pamusoro pemafambiro ari kuita basa iri zvichitevera mashoko akaturwa negurukota rinoona nezvehomwe yenyika maringe nekuvandudzwa kwemakambani 43 ayo mamwe acho anofanirwa kunge achizvimirira nekuongororwa mashandiro awo,” vanodaro.
“Cabinet inogutsikana nemafambiro ari kuita basa iri uye makambani akasiyana ari pazvidanho zvakatsaukana zvekuvandudzwa. Cabinet yakaita chisungo chekuti iongorore zvakadzama makambani maviri pasvondo roga-roga panogara dare iri kutanga nemusi weChipiri svondo rinouya.”
Hurumende inotarisirwa kuwana mari inosvika $350 miriyoni gore rinotevera zvichitevera chirongwa chekuti mamwe emakambani aya azvimirire.
Hurumende yakaita chisungo chekuvandudza makambani ari pasi payo sezvo mamwe acho asiri kuita mari (purofiti) gore negore.
Mugore ra2016, pamakambani 93 ari pasi peHurumende akaongororwa magwaro ezvekushandisa kwaanoita mari, 38 akaonekwa asina kuita purofiti.