Sabhuku opikira kurwisa vatori venhau veKwayedza

SABHUKU wekwaSeke nemumwe mugari weko wechidzimai, avo vakarwisa vatori venhau veK

wayedza vaive pabasa gore rapera, vachagara mujeri kwemazuva makumi maviri kana kubhadhara $600 faindi.

Sabhuku Samson Magodi (46) naRita Tanyaradzwa Ruzvidzo (35), vose vekwaSeke, vakabatwa nemhosva yekurova mutori wemifananidzo weKwayedza, Tertia Makurumidze, ndokupihwa mutongo wavo nemusi weMuvhuro svondo rino nemutongi wedare reChitungwiza Magistrate’s Courts, Tracy Muzondo.

Pakatanga kupinda nyaya iyi mudare iri gore rapera, yakanga iine vasungwa vatatu avo vaipomerwa mhosva yekurova mumhan’ari.

Makurumidze akarohwa nevamwe vagari vemubhuku raMagodi, kwaSeke, apo aive pabasa aine mutori wenhau weKwayedza Kingstone Mapupu nemutyairi Charles Nyakudya.

Pavasungwa vatatu ava, Jairos Magodhi (38) akaregedzwa nedare nguva pfupi yadarika mushure mekunge vafakazi vari munyaya iyi vamuchenura.

Muchuchisi Koropi anoudza dare kuti nemusi wa11 Gunyana gore rapera munguva dzemasikati, Makurumidze akanga ari pabasa achibva atora mifananidzo yaSabhuku Magodi naRuzvidzo.

Sabhuku Magodi akazokonzera mhirizhonga apo akakurudzira vanhu vaivepo kuti varove Makurumidze. Makurumidze akarohwa kakawanda, kudzipwa nekubviswa wigi yaiva mumusoro make achinzi adzime mifananidzo yaainge atora.

Magwaro ekwachiremba anoratidza hudzamhu hwekukuvara kwaMakurumidze ari mudare iri seumboo.

Vasungwa ava vakatongwa nemhosva yekurova (Assault as Defined in Section 89 (1) (a) of the Criminal Law Codification and Reform Act Chapter 9:23.

Vose vairamba mhosva iyi uye vaimiririrwa negweta ravo reMutetwa Law Chambers.

Sabhuku Chamunorwa Seve (74) vemunzvimbo iyi, Mapupu naNyakudya ndivo vakapa huchapupu munyaya iyi.