Matanho ekudzivirira Covid osimbaradzwa
HURUMENDE inoti zvakakosha kuti veruzhinji varambe vachitevedzera matanho akatarwa ekurwisa kupararira kwechirwere cheCovid-19 uye vabati vezvemutemo vachaona kuti matanho aya atevedzerwa nemazvo.
Vachitaura kuvatori venhau muguta reHarare mushure memusangano wedare reCabinet, gurukota rezvekuburitswa kwemashoko nenyaya dzenhepfenyuro, Senator Monica Mutsvangwa, vanoti veruzhinji havafanirwe kuvararirwa zvichitevera kunyevenyutswa kwechirongwa chekumisa kupararira kwechirwere ichi.
“Panyaya yekutevedzerwa kwemutemo, Cabinet inozivisa kuti zvichitevera kunyevenutswa kwechirongwa chekumisa kupararira kwechirwere ichi, vabati vezvemutemo vachange vachiona kuti matanho ekudzivirira Covid-19 atevedzerwa nemazvo ayo anosanganisira kusaita chitsoko-tsoko nekupfeka mamasiki nenzira kwayo,” vanodaro.
Sen Mutsvangwa vanoenderera mberi vachiti, “Veruzhinji vanokurudzirwa kuti vasavarairwe asi kuti varambe vachitevedzera matanho aya.”
Ongororo yakaitwa neKwayedza kunzvimbo dzinosanganisira Harare, Domboshava nekwaSeke inoratidza kuti vanhu vakawanda havachakoshese kupfeka mamasiki kana vachienda panzvimbo dzinoungana veruzhinji uye kusaita chitsoko-tsoko.
Pamusoro pezvo, zvisinei nekuti mutemo unorambidza veruzhinji kuti vafambe-fambe zvisina tsarukano kubva nenguva dza8 husiku kusvika 6 mangwani (curfew) uchiriko, kune vamwe vari kuonekwa vachiutyora zvakare.
Sen Mutsvangwa vanoti zvichitevera danho rekuti zvikoro zvivhurwe, Cabinet yakaona kuti kufambiswa kwemashoko maringe nezvinofanirwa kuitwa mukurwisa Covid-19 kwakaita kuti pave nehwaro hwakanaka hwekuongorora mamiriro anenge akaita zvinhu muzvikoro uye pachange paine nzvimbo dzinoita ongororo iyi.
“Nzvimbo idzi dzichabatsira mukuona kuti matanho ekumisa kupararira kweCovid-19 atevedzerwa uye nekukurudzira kuti pave nenharaunda yekudzidzira isina njodzi kuvana panyaya dzeutano. Chikoro chimwe nechimwe chine nzvimbo yachakabatanidzwa nacho,” vanodaro Sen Mutsvangwa. Kusvika nemusi weChipiri svondo rino, Zimbabwe yanga yave nevanhu 7 837 vakawanikwa vaine hutachiona hwecoronavirus uho hunokonzera chirwere cheCovid-19 mushure mekuvhenekwa kubva pakatanga denda iri muno mumwedzi waKurume gore rino. Pavarwere ava, 6 122 vakatopona asi vamwe 228 vakafa.