Zvikoro: Hurumende yopembedzwa
SANGANO reEducation Coalition of Zimbabwe (ECOZI) riri kupembedza matanho ari kutorwa nebazi rezvedzidzo yepuraimari nesekondari mukudzivirira vana pamwe nevarairidzi kudenda reCovid-19 zvichitevera kuvhurwa kwezvikoro svondo rino.
Rumbidzo iyi yakaitwa nemusi weChipiri uno pamusangano wakaitirwa muHarare nebazi rezvedzidzo yepuraimari nesekondari, ECOZI, nhengo dzedare reParamende nemasangano anomiririra varairidzi.
Musangano uyu waive nechinangwa chekunzvera mamiriro ezvinhu zvichitevera kuvhurwa kwezvikoro panguva iyo paine vaongorori vari kupinda muzvikoro uye zvichabuda muongororo iyi zvichaendeswa kubazi rezvedzidzo yepuraimari nesekondari kuti patorwe matanho.
“Tinotenda Hurumende nekutora danho rekuti zvikoro zvivhurwe (nemusi wa28 Gunyana 2020) uye kunyorwa kwebvunzo dzeZimsec idzo dzichatanga musi wa1 Zvita. Panguva iyo tiri kutsigira kuvhurwa kwezvikoro, tiri kutarisirawo kuti Hurunende inge ichitevedza zvinodiwa nesangano reWorld Health Organisation (WHO) mukuona kuti zvikoro zviri kutevedza here nzira dzekurwisa Covid19,” vanodaro Dr Donald Tobaiwa vanova sachigaro weECOZI.
Zvisinei, vanoti paongororo yemazuva maviri yakaitwa nesangano ravo rakabatana nemamwe anomiririra varairidzi, zvinoratidza kuti zvimwe zvikoro hazvisati zvanyatsogadzirira zvakakwana panyaya yekudzivirira kupararira kweCovid-19.
VaLadistous Zunde vanova mubati wehomwe kuProgessive Teachers Union of Zimbabwe vanoti mune zvimwe zvikoro hamuna zvakakwana zvekurwisa Covid19.
“Tinoshuvira kuti vana nevarairidzi vabatsirwe. Paongororo yatakaita mazuva maviri adarika kubvira patanga kuvhurwa zvikoro, takatoona kuti vamwe vana havana mamasiki chaiwo, vari kuungana uye zvimwe zvikoro hazvina mvura yekushandisa yakakwana,” vanodaro.
VaJohn Dewah, avo vanova Chief Director of Curriculum Development and Technical Services uye vainge vakamiririra munyori mukuru kubazi rezvedzidzo yepuraimari nesekondari, Mai Tumisang Thabela, vanoti bazi ravo riri kuita zvose zvarinokwanisa mukurwisa Covid-19 zvichitevera kuvhurwa kwezvikoro.
“Tinoda kwazvo kuti vana vawaniswe dzidzo yemhando yepamusoro, ndiko kusaka tava kuunza zvidzidzo zvepaterevhizheni kuitira kuti vaye vasinganzwe vabatsirikane. Zvikoro zvakavhurwa mumipanda tichitanga nevachanyora bvunzo dzeZimsec seGrade 7, Fomu 4 ne6.
“Vadzidzi vachanyora Cambridge vakatanga kuvhura musi wa14 Gunyana kuti vagadzirire bvunzo dziri kutanga 1 Gumuguru apowo veZimsec vakavhura nemusi wa28 Gunyana kuti vazotanga kunyora musi wa1 Zvita kusvika muna Ndira 2021. Kuchengetedzwa kwevana nevararidzi panguva ino tinoikoshesa,” vanodaro.
Vanoti bazi ravo riri mushishi kuendesa midziyo yekudzivirira Covid-19 kuzvikoro.
Tinotenda Chikunya anova mukushi wemashoko kusangano reDeaf Zimbabwe Trust anoti vadzidzi vasinganzwi vanofanira kutsigirwa nemidziyo inoenderana navo kuti vakwanise kuwana mashoko ari pamusoro peCovid-19
“Tinotendawo Hurumende nekuunza zvidzidzo zvepaterevhizheni zvevadzidzi vasinganzwi nekuti vanopona nemitauro yemasaini. Pose paiitwa zvidzidzo zveparedhiyo, hapana chavaidzidza nokudaro vakarasikirwa asi vanotosungirwa kunyora bvunzo nevamwe,” anodaro.
Muzvare Priscilla Misihairambwi Mushonga, vanova sachigaro wekomiti inoona nezvedzidzo yepuraimari nesekondari mudare reParamende uye vari mumiriri weMatabeleland South (Proportional Representation), vanoti chikwata chiri kuita ongororo yemamiriro ezvinhu muzvikoro chinofanirwa kuzivisa huwandu hwezvikoro zviri kusangana nematambudziko ekushaya zvinovakwanira pakurwisa Covid-19.