‘HAZVIDI KUVARAIRWA’
Chirwere ichi pari zvino chiri kunyuka kechipiri kune dzimwe nyika dziri muAfrica dzinosanganisira South Africa.
MUTUNGAMIRIRI wenyika President Mnangagwa pamwe chete nesangano reWorld Health Organisation (WHO) vari kukurudzira veruzhinji kuti vatevedzere matanho akatarwa mukurwisa chirwere cheCovid-19 panguva yezororo reKirisimasi neGoredzva uyewo nekuti vasiyane nekuita chitsokotsoko.
Chirwere ichi pari zvino chiri kunyuka kechipiri kune dzimwe nyika dziri muAfrica dzinosanganisira South Africa.
Zimbabwe yakatarisana nedambudziko rekuwanda kwevanhu vari kubatwa neCovid-19.
Kusvika nemusi weChipiri svondo rino, vanhu 12 544 vange vawanikwa vaine chirwere ichi mushure mekuvhenekwa munyika muno.
Pavarwere ava, 10 159 vakatopona asi vamwe 326 vakafa.
Mumiririri weWHO muZimbabwe, Dr Alex Gasasira, vanotenda Hurumende nematanho airi kutora mukurwisa Covid-19.
“Tiri panguva iyo tinofanira kunge tichipemberera Kirisimasi neGoredzva asika, hatifanire kukanganwa zvakatikomberedza nekuti chirwere cheCovid-19 tichinacho uye nyika zhinji dziri kurwisana nacho, kusanganisira Zimbabwe,” vanodaro.
Vanoti zvakakosha kuti Zimbabwe isavarairwe asi kuti irambe ichisimbaradza matanho ekurwisa denda iri.
Kubvira svondo radarika, Zimbabwe iri kutambira vanhu vari kubva kune dzimwe nyika, zvikuru kuSouth Africa, nokudaro kana pasina kucherechedzwa kwemitemo iri maringe nedziviriro yeCovid-19 kuti vanhu ivavo vatange vavhenekwa, panogona kuita dambudziko guru. Mutevedzeri wasachigaro weAd-Hoc Inter-Ministerial Taskforce on Covid-19, Professor Amon Murwira, vanoti mapurisa akawedzerwa pamiganhu yenyika panguva ino apo vanhu vazhinji vari kudzoka kuZimbabwe.
“Chirwere cheCovid-19 chiriko saka ngatichengetedzei upenyu hwedu nekuti tinofanira kufara tiri vapenyu, tiine utano kuitira kuti tigopinda muKirisimasi yegore rinouya. Tawedzera mapurisa anoongorora pamiganhu yenyika uye vanhu ngavasiyane netsika yekupfeka mamasiki mushure mekunge vaona mapurisa asi kuti vaapfeke senzira yekukoshesa utano hwavo,” vanodaro
Prof Murwira.
Vachitaura pazuva rekucherechedza kubatana munyika reUnity Day nemusi weChipiri svondo rino, President Mnangagwa vanoti zvakakosha kuti veruzhinji vasavarairwe panyaya yekurwisa neCovid-19.
“Ndinokurudzira zvakare vanhu munyika kuti varambe vachiyeuka kuti Covid-19 ichiripo pakati pedu. Panguva yezororo uye nemumazuva anotevera, kuchengetedzwa hweutano hwedu nehwevadikani vedu kunofanirwa kukosheswa. Ngatirege kumbofa takavarairwa,” vanodaro President Mnangagwa.