Iyi iKirisimasi ine musiyano
NGUVA yezororo reKirisimasi – iyo inotarisirwa nevanhu vakawanda gore negore – yazosvika apo veruzhinji vanenge vachifara nehama neshamwari.
Asi mhemberero dzegore rino dzine musiyano mukuru kana zvichienzaniswa nemamwe makore nekuda kwechirwerre cheCovid-19.
Kunyuka kwechirwere ichi kwakonzera ndufu dzevanhu vakawanda pasi rose pamwe nekudzikira kweupfumi hwenyika dzakawanda.
Pamusoro pezvo, chirwere cheCovid-19 chaunza mararamiro matsva ayo ari kuona dzimwe tsika nemagariro zvagara zvichiitwa senhaka yemusiiranwa zvichiregedzwa nechinangwa chekudzivirira kupararira kwedenda iri.
Izvi zvinosanganisira tsika yekumhoresana nemaoko nekubatana maoko parufu.
Chirwere ichi chaunza mararamiro matsvawo ekuti veruzhinji vanofanirwa kugara vakapfeka mamasiki uye vorega kuita chitsoko-tsoko.
Kunyangwe misangano nemakungano akasiyana zvave kuitwa kuburikidza nedandemutande (skype kana zoom).
Chinangwa chikuru chiri chekurwisa denda iri.
Izvi zvinoreva kuti apo veruzhinji vari kufara nehama neshamwari, vanofanirwa kukoshesa nyaya yekuzvidzivirira kuti vasabatwe neCovid-19.
Tinodaro nekuti kune vamwe vanofarisa zvekusvika pakutadza kuzvibata kuburikidza nekunwa doro kana kutora zvinodhaka zvekuti vanopedzisira vasisakoshese utano kunyangwe neupenyu hwavo nehwevamwe.
Kwete, hazvina zvazvinobatsira kufarisa zvakadarikidza zvekusvika pakudambura makumbo segurwe nekuti zvakafanana nekuzvisikira moto muziso.
Hongu, kufara hakuna kuipa asi zvinoda kuti munhu akati fare fare obva atindika.
Nyanzvi dzezveutano, kusanganisira sangano rinoona rezveutano pasi rose reWorld Health Organisation (WHO), vari kugara vachikurudzira veruzhinji kuti vazvichengetedze kubva kuchirwere ichi.
Kirisimasi yegore rino ine musiyano nemamwe makore ose nekuti kunyangwe kumachechi vanhu vari kukurudzirwa kuti vasaungane zvekudarika 100, donzvo riri rekumisa kupararira kwechirwere cheCovid-19.
Veruzhinji vari kukurudzirwawo kuti vapemberera zororo reKirisimasi semhuri vari pamba pavo kwete kuenda kunzvimbo dzinoungana vanhu.
Zvinotoshamisa kuti kune vamwe vasisakoshese kuzvidzivirira kubva kudenda iri vachizvinyengedza kuti harisisiko.
Kune vamwe vachasangana nehama neshamwari dzinenge dzabva kunze kwenyika saka zvose izvi zvinofanirwa kunge zvichitariswa.
Zororo iri rine mazuva mashoma nekudaro hazvina huchenjeri kuti munhu aise utano hwake uye neupenyu panjodzi nekufarisa zvisina mwero.
Kune vamwe vanofarisa zvakare panguva yezororo reKirisimasi votadza kuzvibata izvo zvinoita kuti vapedzisire vapinda muna taisireva.
Bazi reutano nekurerwa kwevana rinoti munguva yezororo iri kune vanhu vane chitsama vanobatwa nezvirwere zvepabonde nekuda kwekutadza kuzvibata. Nguva ino zvakare vanhu vazhinji vanenge vachifamba kuenda kunzvimbo dzakasiyana nekudaro upenyu hunofanirwa kukosheswa mumigwagwa.
Mvura iri kunaya zvikuru kumativi mana enyika chinove chinhu chakanaka asi hazvina huchenjeri kuti vatyairi vedzimotokari, vemabhazi kana vanofamba netsoka vayambuke nzizi dzakazara nemvura sezvo kuita kwakadai kuine njodzi kuupenyu.
Tinokushuvirai zororo reKirisimasi rakaropafadzwa.