Kufara tingafare asi . . .
VAKURU vemachechi nemadzimambo vanoti zvakakosha kuti veruzhinji vatevedzere matanho ekurwisa kupararira kwechirwere cheCovid-19 apo vanenge vachipemberera zororo reKirisimasi.
Pastor Hazvinei Muchefa vechechi yeRedeemed Christian Fellowship Ministry (RECFEMI) vanoti chirwere ichi chakanganisa budiriro yezvakawanda munyika muno nepasi rose.
“Mabasa nemabhizimisi adzikira zvikuru munyika sezvo makambani akambovharwa senzira yekurwisa chirwere ichi. Vashandi vakambomiswawo kuenda kumabasa, kunyangwe nanhasi vamwe havana kuzodzokera.
“Nesu kuno kumachechi zvipo chaizvo hakuna, saka inguva yekuti tibatsirane nevanoshaya vawanewo cheuviri panguva ino yekupanana. Asi, zvakakosha kuti veruzhinji vatevedzere matanho akatarwa mukurwisa chirwere ichi apo vanenge vachifara paKirisimasi,” vanodaro Pastor Muchefa. Vanoenderera mberi vachiti, “Panguva ino yezororo, igaroziva kuti tinofanirwa kubatsirana.” Mashoko avo anotsinhirwa naMambo Seke VaStanley Chimanikire vachiti pasi rose rakaita zvekunyangirwa neCovid-19.
“Hapana aimbova nefungidziro yekuti gore rino rose ringatarisane nekuoma kwezvinhu kuburikidza nechirwere cheCovid-19 kubvira mudzimba nemumakambani nemamwe mabasa ose. Saka zviri pachena kuti zororo reKirisimasi mufaro wakaderera zvikuru,” vanodaro Mambo Seke.
Vanoti zvakakosha kuti veruzhinji vafare vachiziva kuti vana vachada kudzokera kuchikoro munguva pfupi inotevera.
“Tine vana vachadzokera kuzvikoro gore rinouya, anongova masvondo maviri chete asara saka tisakanganwe. Ikurudziro yedu semadzimambo kuti tibatsirane pazororo iri nezvatinazvo sezvatagara tichiita kune vanazvo,” vanodaro Mambo Seke.
Mbuya Tariro Chitambo (70) vekuBuhera vanotiwo zvakakosha kuti veruzhinji vapemberere zororo reKirisimasi vachitevedzera zviri kukurudzirwa neveutano pakumisa chirwere cheCovid-19.