Corona: Mwana weZim adadisa
CHIZVARWA chemuZimbabwe – uyo anova mazvikokota wezvesainzi (scientist) achigara kuUnited States – anyora nhoroondo zvichitevera kuve muchikwata chakabura mushonga wekutanga wekudzivirira chirwere cheCovid-19 (vaccine) pasi rose.
Dr Tatenda Shopera ndisenior scientist (bioprocess research and development) pakambani inogadzira mishonga yekurapa yePfizer Inc iri kuUnited States uye iri imwe yemakambani makuru pasi rose.
Dr Shopera mumwe wechikwata chenyanzvi chakabura mushonga wekudzivirira Covid-19 unonzi Pfizer/ BioNTech Covid-19 vaccine.
Pasi rose, Covid-19 yauraya vanhu vanodarika 1,6 miriyoni uye ndokubata vamwe vanodarika 70 miriyoni.
United States ndiyo ine vanhu vakawandisa vari kubatwa nechirwere ichi apo vafa vadarika 300 000 uye vane denda iri vari 17 miriyoni.
Mwedzi wadarika, Pfizer nekambani yainoshanda nayo yeBioNTech vakazivisa kuti mushonga wavakagadzira wekudzivirira Covid-19 wabudirira nechikamu che95 percent kana munhu akabaiwa majekiseni emushonga uyu kaviri mushure memasvondo matatu.
Zvinonzi mushonga uyu unokwanisa kudzivirira munhu kuti asabatwe nechirwere ichi mukati memazuva gumi kana achinge abaiwa jekiseni rekutanga.
Izvi ndizvo zviri mumagwaro akaburitswa svondo rino neveFood and Drug Administration (FDA) vekuUnited States apo vainge vasati vasangana nanachipangamazano vavo vachida kuzeya pamusoro pemushonga uyu.
Nemusi wa11 Zvita, FDA yakabvumidza kushandiswa kwePfizer/BioNTech Covid-19 vaccine kuvanhu vari panjodzi yedenda iri.
Mushonga uyu hausati washandiswa kumadzimai akazvitakura.
Vachitaura padandemutande ravo reLinkedIn, Dr Shopera vanoti vanofara zvikuru kuve muchikwata chakagadzira mushonga uyu.
“Ndinodada zvikuru kuve muchikwata chakabura jekiseni iri uye izvi zvichataurwa nezvazvo kusvikira kuzvizvarwa zvinotevera,” vanodaro.
Dr Shopera vakazvarirwa kuMasvingo, ndokuzokurira mumusha weMbare, muguta reHarare apo Zimbabwe yainge isati yawana kuzvitonga kuzere.
Vakaita O- neA-Level paHarare High School.
Dr Shopera vakaita zvidzidzo zveMathematics, Physics, Chemistry neAccounting paA-Level ndokubudirira zvakanyanya.
Vanoti vakakura upenyu hwekutambura.
“Ndakayarukira mumigwagwa yaive neguruva yemuHarare (Zimbabwe) uye ndine chinhu chimwe chete chandaida kuita zvinoita kuti ndigozorangarirwa kana ndisisipo pasi rino.
Ndagara ndichitenda kuti upenyu hauzi hwako semunhu, asi kuti unofanirwa kuita zvinhu zvakanaka zvinobatsira nharaunda, izvi ndizvo zvinoita kuti uve nechikonzero chekurarama,” vanodaro Dr Shopera.
Vanoenderera mberi: “Nhasi ndinodada kwete nekuti ndiri muchikwata chePfizer, asi nekutiwo ndiri mumwe wevakapa Kirisimasi bhokisi yakakura zvikuru kuvanhu vepasi rose. Ndinofara kuti ndinokwanisa kupa rubatsiro pasi rose.”
Dr Shopera vane zvitupa zvakawanda zvedzidzo zvinosanganisira PhD in Energy, Environmental and Chemical Engineering kubva kuWashington University kuSt Louis neMaster’s Degree in Chemical Engineering kubva kuyunivhesiti imwe chete iyi.