Pembererai asi musaungane: Hurumende
Mapurisa vachange vachiona kuti veruzhinji vatevedzera zvizere mitemo yakatarwa kurwisa kupararira kwedenda iri.
VOSE vari kuronga kuita mabiko vachiungana pazororo reKirisimasi neGoredzva vanoyeuchidzwa kuti zvose izvi hazvizi kutenderwa pasi pemitemo yekurwisa kupararira kwechirwere cheCovid-19 uye vanotyora mitemo iyi vachasungwa, Hurumende inodaro.
Nerimwe divi, vachafamba vari kukurudzirwa kuti vakwire makombi nemabhazi ari kushanda ari pasi pekambani yeZUPCO chete.
Mapurisa vachange vachiona kuti veruzhinji vatevedzera zvizere mitemo yakatarwa kurwisa kupararira kwedenda iri.
Pasi pemitemo iyi, mabiko ekupemberera mazuva ekuzvarwa kwevanhu, mabiko emudzimba, makungano emapato ezvematongerwo enyika nemashoo emimhanzi zvose hazvizi kutenderwa.
Veruzhinji vanosungirwa zvakare kuona kuti pavanoungana kumachechi havadarike 100 uye kana vari parufu havafanirwe kudarika 50.
Vakuru vemachechi nguva pfupi yadarika vakayambirwa pamusoro petsika yekuita minamato yehusiku hwose (all-night prayers).
Kuvhurwa kwenzvimbo dzekutandarira dzinosanganisira mabhawa hazvitenderwe pasi pemitemo yekurwisa Covid-19.
Gurukota rezvinoitika mukati menyika nekuchengetedzwa kwetsika, Cde Kazembe Kazembe, vanoti zvakakosha kuti veruzhinji vatevedzere mitemo ine chinangwa chekumisa kupararira kwedenda iri.
Vakataura mashoko aya muhurukuro yavakaitwa navo padivi pagungano rekuparurwa kwechirongwa chekuti veruzhinji vakoshese kuchengetedza upenyu pakufamba mumigwagwa munguva yezororo riri kutevera che2020 Zimbabwe National Roads Administration (Zinara), Zimbabwe Republic Police neTraffic Safety Council of Zimbabwe (TSCZ) muHarare nemusi weChitatu svondo rino.
“Mabiko emakonzati haazi kutenderwa, asi makungano emachechi nemichato ari kubvumidzwa asi zvakare vanofanirwa kuona kuti havadarike vanhu 100. Pamusoro pezvo, tinofanirwa kuona kuti hatizi kuita chitsokotsoko uye topfekawo mamasiki edu nenzira kwayo,” vanodaro.
Cde Kazembe Kazembe vanoenderera mberi vachiti, “Tinoda zvakare kusimbisisa kuti mitemo iyi haipo kuti vanhu vatadze kusununguka, asi sezvamuri kuona, huwandu hwevanhu vari kuwanikwa vaine Covid-19 hwatanga kukwira zvakare. Saka zvakanakira isu sevagari vemunyika ino kuona kuti tatevedzera mitemo iyi.
“Kusvika pari zvino, taita zvakanaka chose panyaya yekudzivirira kupararira kwedenda iri uye tinoonekwa senyika iri pamusoro-soro pakati pedzimwe panyaya yekurwisa chirwere ichi. Saka ngatirambei takadaro tichitevedzera mitemo iyi.”
Zvakadai, gurukota rezvekufambisa nekusimudzirwa kwezvivakwa, Cde Joel Biggie Matiza vanoyambira veruzhinji kuti vasakwire makombi nemabhazi asiri pasi peZUPCO.
Vachafamba nemabhazi eZUPCO vanokurudzirwa kutevedzera matanho ekurwisa Covid-19 anosanganisira kuzorwa sanitizer mumaoko nekusaita chitsokotsoko.
Pasi pemitemo yekurwisa denda iri, makombi nemabhazi ose anofanirwa kushanda ari pasi peZUPCO uye vanotyora mutemo uyu vanosungwa.
Cde Matiza vanoyambirawo vemakombi nemabhazi vari kushanda zviri pamutemo kuti vashande nguva dzinotenderwa kubva na6 mangwani kusvika 10 husiku (curfew).