Mbavha dzakaba goridhe
MAKORORO mashanu ainge akapakata mabhemba (machete) anonzi svondo rapera akapinda mumugodhi wegoridhe munguva dzehusiku muine vaishandamo kuPenhalonga, kuManicaland, ndokuvavhundutsira vachibva vaba ivhu regoridhe (gold ore) rairema 200kg ndokuenda naro.
Assistant Inspector Luxson Chananda avo vakafanobata chigaro chemutauriri wemapurisa kudunhu reManicaland vanotsinhira nyaya iyi.
Vanoti nemusi wa19 Zvita nenguva dza10 husiku, Tinashe Mandava (29) anonzi akapinda mumugodhi weTyconel uri kuPenhalonga aine vamwe vake vana ndokuvhundutsira vanhu vaishandamo vachiti vaida ivhu rine goridhe.
“Pakapinda Tinashe Mandava nevamwe vake vana, avo vasati vave kuzivikanwa, vanonzi vakasvikowana pasi pemugodhi uyu paina Alvin Nduna (29) wekuSakubva, kwaMutare anova mushandi waMai Memory Kamoto (40) vekuPenhalonga vanova muridzi wemugodhi uyu. Alvin Nduna aivawo nevamwe vatatu apo vaiita basa rekuchera goridhe mumugodhi uyu,” vanodaro Asst Insp Chananda.
Makororo mashanu aya anonzi akasvikotaurira Nduna nevamwe vake kuti vaida ivhu raive negoridhe.
Nduna nevamwe vake vanonzi vakamboedza kuramba kuita zvaidiwa nembavha idzi asi vakarohwa nemabhemba zvakazoita kuti vabvume vave kutyira upenyu hwavo.
“Ipapo Tinashe Mandava nevamwe vake vana vanonzi vakazotora ivhu iri raiva mumasaga mana ehuremu hwema50 kgs ndokuenda nawo ayo asina kuzivikanwa kuti aikosha mari yakadii. Ivhu iri raiva risati ragaiwa kuti kuburitswe goridhe mariri,” vanodaro Asst Insp Chananda.
Mandava ndiye chete akakwaniswa kusungwa nemapurisa eZimbabwe Republic Police (ZRP) apo vamwe vake vana vachiri kutsvagwa nekuda kwemhosva yavari kupomerwa iyi.
“Tinashe Mandava akachengetedzwa nemapurisa apo vamwe vana vari kutsvagwa nekuda kwemhosva imwe chete iyi. Tiri kukumbira kuruzhinji kuti kana pane vanoziva vatibatsirewo nekumhan’ara kune mapurisa ari padyo navo kana ekuPenhalonga kuti vasati vabatwa ava vasungwe,” vanodaro Asst Insp Chananda.