Okurudzira vatambi kuti vadzidze
MUTAMBI wetsiva ari kusimukira, Brandon “Boika” Denese, anoti zvakakosha kuti vatambi vemitambo yakasiyana vakoshese dzidzo sezvo ichizobatsira mune ramangwana kana vachinge vasisatambe mitambo iyi.
Veruzhinji vanoziva Boika achirwa semvumba izvo zvamuona achihwina mabhande anosanganisira World Boxing Federation (WBF) Inter-continental lightweight title nereWorld Boxing Organization Africa welterweight title.
Boika anoti ange achiita zvidzidzo zveBachelor of Science Hounours, Degree in Politics and Public Administration uye ari kufambira mberi nedzidzo apo ave kuda kuita dhigirii reMasters in International Relations payunivhesiti yeGreat Zimbabwe.
“Tinoita zvedu zvemitambo asi dzidzo ndiwo musimboti wehupenyu, hapana chaunoita muhupenyu hwako pasina dzidzo,” anodaro Boika.
Anopa muenzaniso wegurukota revechidiki, mitambo nenyaya dzekutandara – Dr Kirsty Coventry – avo vaimbove nyanzvi yemutambo wekutuhwinha pasi rose.
“Dr Coventry ndichivaona ndinonzwa manyemwe nekuti pavave ndipo pandinoda kuzosvikawo mune remangwana.
Pavasvika zvinorakidza kuti dzidzo inokosha muhupenyu. Ngatiite zvechikoro hama dzangu,” anodaro.
Kubva Boika akatanga zvetsiva, atamba mitambo misere uye ndokuhwinha yose.
Shasha iyi inorwa iri pasi peCharles Manyuchi Boxing Academy iyo yakavambwa nechinangwa chekusimudzira vatambi vemangwana.
Boika anoti chishuvo chake kuti remangwana agovewo nechikwata chetsiva chinosimudzira vamwe vatambi.
“Makore andashanda naCharles Manyuchi achindisimudzira, ndadzidza zvakawanda kubva kwaari.
Saka zvimwe zvinhu zviri mupfungwa dzangu zvandinodawo kuzoitawo mune remangwana.
“Ishuviro yanguwo kuzotangisa Brandon ‘Boika’ Denese Boxing Academy yekusimudzira vatambi vetsiva vemangwana,” anodaro Boika.