Farai zvenyu, asi … :
SHASHA dzemitambo yakasiyana dzokurudzira veruzhinji kuti vazvichengetedze kubva kuchirwere cheCovid-19 pamwe nenjodzi dzemumigwagwa panguva yezororo reKirisimasi.
Murairidzi weDynamos FC neYoung Warriors U-23, Tonderai Ndiraya, anoti anoshuvira veruzhinji munyika kuti vave neKirisimasi yakanaka asi zvakakoshawo kuti vatevedzere matanho akatarwa ekurwisa Covid-19.
“Ndinoda kukorokototedza nyika yedu tose pazuva iri, iri izuva guru remufaro uye tose tinoda kufara nehama neshamwari. Asi gore rino zvakasiyana nekuda kweCovid-19 iyi yakadai kuuya. Ngatingwarirei kwose kwatinenge tiri tigare takazvichengetedza tichitevedzera mitemo inodiwa.
“Kunze kwecoronavirus, kune zvimwe zvirwere zvakawanda zviriko uye njodzi dzemumigwagwa. Vanhu fambai zvakanaka musamhanyise motokari nekuti hatisi kuda kurasikirwa nehama neshamwari pazororo iri nekuda kweCovid-19 kana njodzi dzemumigwagwa,” anodaro Ndiraya.
Apo zvikwata zvenhabvu zvemuno zvakapihwa mvumo yekutanga kuita gadziriro, Ndiraya anoti chikwata chake akamboshanda nacho kwemavhiki mashanu akaona kuti chakasimba.
“Tine matanho atichatora ekugadzirisa vatambi vanoregerera miviri yavo. Isu takavabika uye tinoziva kuti iye zvino vave padanho rekukwikwidza saka ndizvo tinotarisira kuti varambe vari,” anodaro Ndiraya.
Shasha yakambonetsa ichitamba cricket kuchikwata chenyika chemaChevrons – Hamilton Masakadza – uyo ave director of Cricket kuZimbabwe Cricket, anoti pazororo reKirisimasi achange aine mhuri yake pamba.
“Tikatevedzera mitemo yose inodiwa mukurwisa chirwere cheCovid-19 tinokunda. Chirwere ichi chichiriko uye vanhu pavanoungana ndipo pachinogona kutapukira saka zvakakosha kuti titevedzere mitemo nguva dzose.
“Ini hangu ndichange ndiri kumba nemhuri yangu nemadzitezvara angu ari kuuya kuzopembera nesu zuva iri,” anodaro Masakadza.
Pauline Jani – uyo anove shangwiti yenetball uye vazhinji vanomuziva ari muchikwata chemaGems chakaita mukurumbira mushure mekuenda kumakwikwi eWorld Kup kuLiverpool, kuEngland mugore ra2019 – anoti zvakakosha kuti veruzhinji vapemberere Kirisimasi vari mudzimba dzavo senzira yekurwisa kupararira kweCovid-19.
“Hupenyu hwedu tose hunokosha saka ngatigarei mudzimba dzedu uye ngatisafambe zvisina maturo nekuti tinozvikuvadzisa tose. Nguva yeKirisimasi vanhu vanoda kufara vachiungana vakawanda saka ndinokurudzira kuti ngatisaungane. Ngatisape Covid-19 mukana wekuti ikanganise hupenyu hwedu saka ngatitevedzere mitemo yese tizvichengetedze,” anodaro.