Dzosai zvikwereti, kwete kunzvenga
ZIMBABWE mwaka wekurima uchangodarika yakawana goho guru rinosanganisira rechibage zvichitevera rutsigirwo rwakasimba rweHurumende uyewo nemvura yakanaya zvakanaka.
Rubatsiro rweHurumende urwu rwakapihwa kuvarimi vekumaruwa pasi pechirongwa chePfumvudza nechePresidential Input Support Scheme apowo nerimwe divi varimi vakuru vakawaniswa zvikwereti kubva kumabhangi muchirongwa cheCommand Agriculture.
Kusiyana nevarimi vadiki, varimi vakuru vanotarisirwa kuti vabhadhare zvikwereti zvemari zvavanenge vapihwa kumabhengi.
Asi, kune vamwe vave kunzvenga-nzvenga panyaya yekubhadhara zvikwereti izvi inove tsika yakaipa chose.
Izvi zvaita kuti Hurumende itarire varimi ava nguva kusvika musi wa30 Mbudzi gore rino yekuti vange vabhadhara zvikwereti izvi uye kukundikana kwavo vachatorerwa matanho akaomarara.
Chisingazivikanwe nevamwe varimi vari pasi peCommand Agriculture ndechekuti kurima ibhizimusi uye kana vatora zvikwereti vanofanirwa kubhadhara kuitira kuti mari iyi irambe ichitenderera ichibatsira mukusimudzira upfumi hweZimbabwe.
Kusabhadhara kwavo zvikwereti kunodzosera kumashure zvikuru budiriro yenyaya dzekurima munyika.
Hurumende yakatanga chirongwa cheCommand Agriculture mugore ra2016 nechinangwa chekuti munyika muve nechikafu chinokwanirana uye kuti Zimbabwe isatenge chikafu ichi kubva kunze izvo zvinobatsirawo mukuvandudzwa kwehupfumi hwenyika.
Varimi veA2 vakapihwa minda neHurumende pasi pechirongwa chekugovera ivhu kune veruzhinji nevamwe vane mapurazi makuru ndivo vari kuwana zvikwereti pasi pechirongwa ichi.
Pamusoro pazvo, chirongwa ichi chine donzvo rekuti pave nemabasa nekusimudzirawo upenyu hwevarimi nevamwe vavanodyidzana navo.
Command Agriculture yaita kuti Zimbabwe ibure goho guru rezvirimwa zvakasiyana izvo zvakakosha mukuzadzikisa zvinangwa zvebudiriro yeupfumi hwenyika zveVision 2030 pamwe nezveNational Development Strategy 1.
Nyika ino iri kutarisirwa kuwana matani echibage 2,7 miriyoni mumwaka uchangodarika, ayo akawanda zvikuru mukati memakore 20 adarika.
Tsika yekusada kubhadhara zvikwereti iyi ndiyo iri kuita kuti zvakare vamwe varimi vezvirimwa zvinosanganisira soya bhinzi nedonje vanenge vabatsirwa nemakambani emakondirakiti vatengesere goho ravo kumwe.
Ichi chitsotsi chiri pachena kuti murimi anosiya kambani yamupa chikwereti — kubvira pambeu, fetiraiza nemishonga yekufiritisa zvirimwa — achitengesera goho kumakoronyera anoda kukohwa paasina kurima.
Hurumende yakadzika mutemo unorambidza kutengeswa kwesoya bhinzi nedonje kumakoronyera kana kunze kwenyika nemumwe munhu kusara kwedura guru renyika reGrain Marketing Board (GMB).
Izvi zviri pasi pemutemo weGrain Marketing (Control of Sale of Cotton) Regulations 2021, Statutory Instrument 96 of 2021 neGrain Marketing (Control of Sale of Soya Beans) Regulations 2021, SI97 of 2021.
Kurima ndihwo hwaro hwebudiriro yeZimbabwe nekudaro zvakakosha kuti varimi vashande nesimba uye votendeka kana vachinge vapihwa zvikwereti kuburikidza nekuzvibhadhara.