Mutambo wetsiva wopfuudzwa mberi
MUTAMBO waKudakwashe ‘Take Money’ Chivandire – uyo ange achifanirwa kurwa naCathrine Phiri wekuZambia nemusi wa29 Ndira – wave kuzoitwa nemusi wa26 Kukadzi zvichitevera chikumbiro chakapihwa nevarongi kuti upfuudzwe mberi sezvo vari kumbomhanyidzana nekutsvaga vakotsveri vanoutsigira.
Shasha mbiri idzi dziri kufanirwa kurwira bhande reWorld Boxing Council (WBC) Super Bantam Weight kunyika yeZambia.*
Nguva pfupi yadarika, mapuromota etsiva ari kuronga mutambo uyu veOriental Quarries Boxing Promotions vekuZambia vakazivisa kuti wave kumbopfuudzwa kumberi nechinangwa chekuti vawane nguva yekutsvaga vakotsveri.
Mashoko akabva kuZambia aya akagamuchirwa nemurairidzi waChivandire – Clyde Musonda – uyo anove maneja wake zvakare achiti danho iri rakanaka nekuti rinovapa mukana wekusimbisa gadziriro dzavo vakatarisana nemutambo uyu.
“Takatambira chikumbiro chakabva kuZambia chekuti tishandure zuva richasangana vasikana vaviri ava.
Kana danho rakadai ratorwa, pane zvikuru zvinenge zvichirongwa kuti mutambo uyu ugonakidze.
Saka isu tiri kungotevedzerawo uyezve zviri kutipa nguva yekuti tigadzirire zvakanyatsosimba kudarika zvatange tichiita nekuti mutambo uyu tiri kuda kuuhwina tigounza bhande munyika, Take Money arambe achisimukira mumutambo uyu.
“Tiri kuzvitemba kuti tinouya nebhande, saka tiri kushanda nesimba kuti tigosimudza mureza wenyika,” anodaro Musonda.
Pane vhidhiyo riri kutenderera padandemutande Chivandire achiita gadziriro dzake naMusonda apo Take Money anenge achitaura kuti bhande iri ratove rake uye Phiri haasisiri shasha yeWBC.
“Cathrine ndiri kukuvinga. Ndini shasha itsva yeWBC, iwe uri shasha yakudhara isisina bhande,” anodaro Chivandire muvhidhiyo iri.