Mukadzi afira kun’anga
• ‘Anga asingarware’
MUDZIMAI wemuHarare, uyo ange aenda kunobatsirwa kune imwe n’anga aina nasahwira wake muguta iri, anonzi akazofira kugodobori iri nenzira isiri kunzwisika.
Nyaya iyi yatova kumapurisa.
Talent Sibanda (38) aigara pamba pevabereki vake panhamba 8532 Kuwadzana Phase 3 anonzi akanofira kuWhitecliffe kumba kwen’anga inongozivikanwa saSekuru Mbizi uko anga achishandirwa.
Mutauriri wemapurisa muguta reHarare, Inspector Tendai Mwanza vanotsinhira nyaya iyi.
“Tine nyaya yemudzimai anonzi Talent Sibanda uyo ari kunzi akatorwa neshamwari yake inonzi Euvon Dube vakaenda kun’anga uko azonofira. Nyaya iyi iri kuferefetwa kuti kutsvagwe chaizvo zvakaitika,” vanodaro
Insp Mwanza.
Sharmaine Sibanda (27) anove munin’ina wemushakabvu anotsinhira kufa kwemukoma wake achiti akaenda kun’anga iyi asingarware ndokusvikofa.
“Mukoma wangu Talent Sibanda akanofira kun’anga inonzi Sekuru Mbizi yekuWhitecliffe nemusi weSvondo 13 Kukadzi.
Aiva atorana neshamwari yake inonzi Euvon Dube mangwanani emusi uyu ndokuenda kun’anga uko vaida kunorapisa munin’ina waEuvon anonzi Nomalanga Nduna uyo airwara zvakanyanya,” anodaro Sharmaine.
Anoti Dube akasvika kumba kwavo na8 mangwanani ndokutora Talent vachibva vaenda kun’anga iyi.
“Zvinonzi pavakasvika, vakawana munin’ina waEuvon achishandirwa ari mumba achinzi aipera simba nekufenda,” anodaro Sharmaine.
Nduna anonzi akazonzi aburitswe panze, panguva iyi apo Talent akanzi apinde kuti abatsirwewo mudare ren’anga iyi.
“Panguva iyi, zvinonzi nen’anga iyi yakaputisa sisi vangu fodya yebute vachibva vabatwa nemweya waitaura zvakawanda uyo wainzi ndiwo waivanetsa muupenyu hwavo. N’anga iyi inoti panguva iyi yakaona nyoka yaiva yakamonera Talent muchiuno achinzi aizvonyongoka sezvinoita nyoka achirutsa.
“Anonzi akazofenda kuma3 zuva rodoka achibva aburitswa panze ndokuiswa pavheranda,” anodaro Sharmaine.
Anoti mukoma wake aisarwara uye haazive kuti chirwere chaaibatsirwa chaiva chabva kupi.
“Sekuru Mbizi vanonzi vakamuburitsa panze pavheranda kusvika na4:30 zuva rodoka apo vanonzi vakaedza kuita first aid paanonzi akazviitira tsvina nekubuda ropa nekusikarudzi.
“Vamwe vanhu vaiva pan’anga apa vanonzi vakazomugezesa vakamupfekedza mbatya itsva idzo dzinonzi dzaiva dzatengwa naEuvon kusanganisira nechipfeko chemukati,” anodaro Sharmaine.
Mbatya dzakabviswa Talent dzinonzi dzakawatya dzikaomeswa pan’anga apa.
“Vachitaura, ivo vanoti vakazomutakura kuenda naye kune imwe surgery kuWhite House chiremba akamuona akanovakurudzira kuti vamudarikidze kuchipatara cheParirenyatwa (Group of Hospitals) uko vakasvikonzi ainge atofa kare,” anodaro Sharmaine.
Dube nevamwe vemhuri yake vanonzi vakazotaura neimwe kambani inoviga vafi uko vakazoendesa mutumbi waTalent pasina hama dzake.
Mushure mezvo, vakazoenda kuShamva kunoshandira Sharmaine kunomuzivisa kuti mukoma wake aiva ashaika.
“Vakasvika kubasa kwangu na1:30 mangwanani uko ndinoshanda pamwechete naEuvon. Vakasvika vachinditi Talent afenda ndokuzondizivisa pava paya kuti aiva afa,” anodaro Sharmaine.
Vanhu vakazoenda kunoungana kumba kwevabereki vaTalent kuKuwadzana Phase 3.
“Vanatete vedu vakazoenda kunomhan’ara nyaya iyi kumapurisa ekuDzivaresekwa uko vakazonzi vaende kuMarimba. Euvon Dube nen’anga iyi vakashevedzwa vakabvunzurudzwa vakasiiwa. Mutumbi wasisi waongororwa nhasi (Chitatu) nemachiremba uye zvabuda zvinonzi tichazviwana mushure mesvondo. Mutumbi uyu uchanovigwa kuMatobo, kuBulawayo,” anodaro.
Sharmaine anoti chinoshamisa ndechekuti pakafa Talent, munin’ina waDube airwara akabva apora.
“Vabereki vose vakashaika, baba vainzi Marko Sibanda uye amai vangu Thokozile Ndhlovu vakashaika mwedzi minomwe yakadarika.
“Izvozvi guva ravo rakadhirika, handichaziva pamwe ndizvo zvimwe zvaida kunobvunzirwa naTalent. Takaberekwa tichingova 2 saka ndasara ndoga,” anodaro Sharmaine.
Kwayedza haina kukwanisa kutaura naDube pamwechete naSekuru Mbizi kuti vapewo mativi avo panyaya iyi sezvo vaisadavira nhare dzavo.
Method Musingare (42) anogara pamba pana Sharmaine anoti akashamiswa nekufa kwaTalent uyo waaive naye mangwanani emusi wavakaenda kun’anga uyu.
Mbuya Mediate Sibanda (69) vanove tete vemushakabvu vanoti vanotarisira kuti mapurisa vachaita basa ravo nemazvo.