Malajila oringa mberi
AIMBOVE mutambi wechikwata chenyika chemaWarriors nezvimwe zvinosanganisira Dynamos, Highlanders neMamelodi Sundowns yekuSouth Africa – Cuthbert ‘Cazola’ Malajila – anoti ari kugutsikana nematambiro ari kuita chikwata chake cheCUMA Academy icho chiri kukwikwidza mumwaka wacho wekutanga muNorthern Region Division One.
Malajila chishuvo chake chekuona chikwata ichi chichikwikwidza muDivision One chakazozadzikiswa mwaka uno apo chakatanga kutamba muligi iri mushure mekunge chapedza makore mazhinji chichikundikana.
Kusvika pari zvino, CUMA Academy yatamba mitambo minomwe ikahwina miviri ndokuita mangange mitatu uye ikakundwa miviri.
Malajila anoti matambiro akatanga achiita chikwata chake haana kumufadza asi pari zvino ave kugutsikana sezvo ave kuona shanduko zvichitevera mutambo wavo neHarare City Curbs uyo wakapera uri mangange 2-2.
“Rwendo rwatafamba kuti tipinde mudivision one rwange rwakareba, semutungamiri wechikwata ndinonzwa kufara sezvo tave pedyo nekusvika kuPremier League.
Asi iye zvino tinoda kutanga tambogadzira zita redu muDivision One tichivaka toramba tichisimukira.
“Rwendo rwacho ruchiripo uye ndinoziva kuti harusi nyore, pari kutodiwa kuramba pachishandwa nesimba kusvika kuPremier League,” anodaro.
CUMA Academy, iyo inozivikanwa ichishandisa nhandare yeRimuka Stadium kuKadoma, iri kutambira paChakari Stadium sezvo yeRimuka ichiri kumbovandudzwa.
Malajila anoti vanotarisira kuti vange vave kutambira nhabvu kuRimuka pamberi pevatsigiri vavo mumasvondo anotevera.
“Vanotiziva vanoziva kuti muRimuka hamubudike zvekumhanya saka tiri kumhanya kuti ivandudzwe, tigotanga kutambira mitambo yedu pamberi pevatsigiri vedu,” anodaro Malajila.
Svono rino, chikwata chake chichange chiri pamusha kuChakari uko chichasangana neCommando Bullets.