Vechidiki siyanai nezvinodhaka
ZVIZVARWA zveZimbabwe nemusi weMuvhuro svondo rino zvakabatana mukupemberera zuva revechidiki reNational Youth Day.
Zuva iri rinocherechedzwa pagore nemusi wa21 Kukadzi.
Vechidiki ndivo vatungamiriri vemangwana venyika nekudaro zvakakosha kuti vange vachipihwa gwara rakajeka mukurarama kwavo.
Hurumende iri kuita mabasa akasiyana ekusimudzira raramo yevechidiki ayo anosanganisira kuvatsigira mukutanga mabhindauko emaoko pamwe nekuvapa mukana wekuenderera mberi nefundo.
Asi kune vamwe vechidiki vari kurasika gwara reupenyu kuburikidza nekufurirana zvisina maturo.
Vakadai ava vanosanganisira vari kutora zvinodhaka zvisingatenderwe mumiviri izvo zvinosanganisira mbanje nemutoriro.
Kazhinji, vechidiki vanopedzisira voita mabasa akaipa aya kuburikidza nekufurirana kana kuti kushaya zvekuita.
Panguva yaibhebha chirwere cheCovid-19 apo Hurumende yakatora matanho ekuedza kuchimisa (lockdown), vechidiki vakawanda vanonzi vakatanga kutora zvinodhaka.
Chikonzero chikuru ndechekuti vechidiki ava vanonzi vaishaya zvekuita zvinovavaridza vopedzisira vave kufurirana kutora zvinodhaka.
Mukutora zvinodhaka umu, vanopedzisira upenyu hwavo hwaenda kumawere apo vanopara mhosva dzakadai sekuba, kurwa nevamwe kana kuponda munhu chaiko.
Vechidiki vechisikana vari kutorawo zvinodhaka izvo zvinoita kuti pave nenjodzi huru yekuti vanogona kumbunyikidzwa zvine chekuita nebonde kana kubatwa chibharo.
Dambudziko rekutorwa kwezvinodhaka zvisingatenderwe mumuviri nevechidiki iguru munyika muno.
Chinonetsa ndechekuti kana akatanga kutora zvinodhaka izvi hazvisi nyore kuti azviregedze uye panotodiwa rubatsiro rwakadzama kuti asiyane nekatsika kakaipa aka.
Izvi zvaona Hurumende ichivamba homwe yekubatsira vari kusangana nedambudziko rakadai.
Kune mizinda ine chitsama zvakare yakamirira kudzoreredza vechidiki vane upenyu hunenge hwakanganiswa nekutora zvinodhaka.
Pamusoro pezvo, masangano akawanda ari kutsigira vechidiki kuti vave neupenyu hunoendeka, rinova danho rinokudzwa zvakanyanya.
Sekutaura kwemutungamiriri wenyika President Mnangagwa nemusi weMuvhuro muguta reHarare pakupemberera zuva revechidiki, ino ndiyo nguva yekurwisa dambudziko rekutorwa kwezvinodhaka zvisingatenderwe mumuviri nevechidiki.
Hurumende yakaumba komiti yemakurukota iyo ine basa rekuona kuti pave nehurongwa hwajeka hwakananga kupedza dambudziko iri.
Zvakakoshawo kuti vachidiki vasangoteverera zvinhu zvose zvose sehundi inopupurutswa nemhepo.
Ngavazive zvakavakoshera muupenyu kwete kufurirana zvisina musoro uye vozochema mangwana kana vapinda muna taisireva.
Vechidiki ndivo hwaro hwakasimba hwebudiriro yenyika kureva kuti kana vakangoita zinyeke-zinyeke, remangwana reZimbabwe rinoenda mudondo.
Zvakakoshawo kuti vechidiki vadade nenyika yavo pamwe nekuve neruzivo rwakazara rwenhoroondo yekwayakabva.
Vechidiki ngavabatsire mukuvaka nyika kwete kuswerotora zvinodhaka.
Nyika inovakwa nevene vayo, vechidiki ndivo vamwe vacho!