‘Ngwarirai maperembudzi’
BAZI rezveutano nekurerwa kwevana rinoti matunhu maviri ekuManicaland, Buhera neChipinge, ari panjodzi huru yevanhu vanogona kubatwa nechirwere chemaperembudzi.
Dr Nicholas Siziba, avo vari kuona nezvechirwere ichi mumatunhu aya, vanoti pane njodzi yekunyuka kwedenda iri zvisinei nekuti harina kumboonekwa kunzvimbo idzi gore rapfuura.
Buhera neChipinge dzakaita vanhu vaviri vakabatwa nemaperembudzi pakati pegore ra2012 na2017.
Dzimwe nzvimbo dziri panjodzi yekunyuka kwechirwere ichi munyika muno dzinosanganisira Matopos, Bulilima, Hwange, Binga, Makonde, Zvimba, Banket, Karoi, Chiredzi South, Bikita, Gutu, Gokwe, Mudzi, Mutoko, Rushinga, Mbire neGuruve.
Muna2020, vanhu 15 vakabatwa nemaperembudzi munyika yose uye muna2021 vana (4) ndivo vakabatwa nacho.
Dr Siziba vanoti pasi rose rakapemberera zuva reWorld Leprosy Day kupera kwaNdira dingindira riri raikurudzira kubatana mukurwisa chirwere ichi.
Vanoti Zimbabwe yakabviswa pakati penyika dzine njodzi yekuva nedenda iri neWorld Health Organisation (WHO) muna1987.
“Mushure mekubviswa pakati penyika dziri panjodzi huru yechirwere ichi neWHO muna1987, Zimbabwe yakabvisawo maperembudzi sechiwrere chinonetsa veruzhinji. Zvakashamisa pakabatwa vanhu vanosvika gumi nevaviri nechirwere ichi pakati pegore ra2012 nera2017 kuMatabeleland North.”
Mashonaland Central yakaita vanhu vana vakabatwa nechirwere ichi pakati pegore ra2015 na2020 kuchitiwo Mashonaland East ine vaviri vakabatwawo nacho muna 2021.
“Vanhu 12 vakabatwa ava vakatishamisa zvakanyanya zvakazoita kuti bazi rezveutano ritange kuongorora chirwere ichi munyika yose,” vanodaro Dr Siziba.
Vanoti pari zvino nyika ino iri kushanda isina kwekuendesa vanenge vabatwa nemaperembudzi sezvo nzvimbo yanga iripo paSally Mugabe Hospital yakavharwa nekuda kweCovid-19.
Dr Siziba vanoti sezvo kuongororwa kwemaperembudzi kwakaderera, kunogona kuine vamwe vanhu vane chirwere ichi asi zvisingazivikanwe.
“Maringe nehurongwa hwe2015-2020 Global Leprosy Strategy, pasi rose kunofanira kusara pasisina munhu anobatwa nechirwere ichi, kuremara, kutapuriranwa kwechirwere ichi kana rusarura. Asi, izvi zvinogona kusabudirira kana munyika tisina zvikwanisiro zvekuti tiongorore vanhu nekurapa chiwerere ichi,” vanodaro Dr Siziba.