Arteta orumbidza Wilshere
MIKEL ARTETA orumbidza Jack Wilshere zvichitevera kutengwa kwaakaitwa nechikwata cheAarhus chekuDenmark achiti mutambi uyu akange ave nemufaro kutamba nhabvu zvekare.
Wilsher, uyo aimbove mutambi weEngland mwaka uno, ange achiita gadziriro dzake nemaGunners asi asina hake kondirakiti kuchikwata ichi, ndokuzopihwa kondirakiti neAarhus yekusvika pakupera kwemwaka uno.
MaGunners akagamuchira mutambi uyu (30) gore radarika munaGumiguru, akambotaura kuti akange ave kushungurudzika mupfungwa apo akapedza mwedzi mitanhatu asingatambe nhabvu.
Asi Arteta anofunga kuti panguva yaange ari kuchikwata chake mwedzi yadarika zvakamurangaridza kuti mutambi uyu ndewe pamusoro.
“Chekutanga ndinomutenda, tange tine nguva yakanaka tiri tose,” anodaro Arteta achitaura apo aiita gadziriro dzechikwata chake neWolves svondo rino.
“Ndinovimba kuti takamubatsirawo nepadiki pataikwanisa. Chikwata chatinacho ichi chaimubatsira mazuva ese izvo zvaiita kuti anzwe kuve mutambi wenhabvu.”
Wilshere akakwanisa kutambira maGunners ka178 mumakore 10 ndokuzobva kuchikwata ichi mugore ra2018.
Ave kutarisirwa kutamba mutambo wake wenhabvu wekutanga kubva zvaakapedzisira gore radarika apo akatambira Bournemouth muChampionship.
“Zvakangoitika nekuchimbidza,” anodaro Wilshere. “Ndakaita hurukuro nemumwe wevarairidzi, David Reddington. Akanditsanangurira nezvechikwata ichi, chinogona sei uye ndaizofarira zvakadini kuchitambira.
“Akamboshanda nemumwe munhu wandakashanda naye kwemakore, Roy Hodgson, uyo ndaifarira kushanda naye. Ndaiziva Dave ange ane mashandiro ake akasiyana nevamwe. Ndakazotaura nemurairidzi ndikafarira zvikuru zvaaitaura.
“Ndaigara ndichitaura kuti mubasa rangu iri ndinoda kumboitawo zvimwe zvinhu zvitsva. Ndinofunga kuti ino ndiyo yange iri nguva yekuti ndimboedza zvimwe zvitsva, ndimbobuda muEngland ndinotamba kune dzimwe nyika,” anodaro Wilshere.