Vechidiki siyanai nezvinokora
DAMBUDZIKO rekutorwa kwezvinodhaka zvisingatenderwe mumuviri, kunyanya nevechidiki, riri kuramba richikura muZimbabwe uye izvi zvaona Hurumende ichiumba komiti yemakurukota yekugadzirisa mamiriro ezvinhu aya.
Pamusoro pezvo, Hurumende yakaumba homwe zvakare yeDrug Abuse Fund iyo ichashandiswa mukutsigira zvirongwa zvekurwisa kutorwa kwezvinodhaka.
Dambudziko iri rinonzi rakawedzera muna2020 apo pakanyuka chirwere cheCovid-19 zvakaona zvikoro zvichivharwa kwenguva yakareba senzira yekudzivirira kupararira kwedenda iri.
Panguva iyi, vechidiki vakawanda vaive vagere kudzimba vasina zvekuita izvo zvakaita kuti vamwe vatange kufurirana kutora zvinodhaka.
Dambudziko iri rinoda mukomberanwa mukurirwisa kwete kumirira vakadai semapurisa chete.
Sekutaura kwevakafanobata chigaro chadirector kubazi revashandi nekubatsirwa kwevanotambura, zvakakosha kuti zvikoro zvose – kubvira pagwaro rekupuraimari, sekondari, makoreji nemayunivhesiti – zvive nezvidzidzo zvakasimba pamusoro pekuipa kwekutora zvinodhaka. Danho rakadai rinobatsira zvakanyanya sezvo vechidiki vanoyaruka vaine ruzivo rwakadzama rwekuipa kwekutora zvinodhaka zvisingatenderwe mumuviri.
Zvinodhaka izvi zvinosanganisira mapiritsi anozivikanwa nekunzi blue tablets, BronCleer kana kuti Bronco, cocaine methamphetamine, musombodhiya neguka.
Zvimwe zvacho zviri kugadzirwa muZimbabwe asi zvakawanda zviri kubva kunze uye zvichipinzwa munyika muno nenzira dzechikiribidi.
Nyaya huru iri kunetsa ndeyekuti kunze kwekutorwa kwezvinodhaka zvakadai sembanje nedoro rinosanganisira rekachasu, kuwanda kwevari kutora cocaine necrystal methamphetamine kunotaridza kuti dambudziko iri radzika midzi muZimbabwe.
Kana munhu akatanga kutora cocaine nemethamphetamine hazvisi nyore kuti azozviregedza sezvo anenge ave kunzwa kuda kuzvitora zuva nezuva.
Izvi zvinoreva kuti pane zvikwata zvemaguruvhani zviri kuunza zvinodhaka izvi munyika muno uye zvichitengeswa nyore.
Kutorwa kwazvo, kunze kwekukanganisa utano hwevechidiki, kuri kukonzera vamwe kuti vapare mhosva dzakadai sekubata chibharo uye mhirizhonga munharaunda dzakasiyana.
Bazi reutano nekurerwa kwevana rinoti ongororo rayakaita inotaridza kuti chikamu che45 percent chevarwere vepfungwa zvinokonzerwa nekutora zvinodhaka zvisingatenderwe mumuviri uye kunwa doro zvakadarikidza.
Pamusoro pezvo, kutora zvinodhaka kunonzi kunokonzera zvakare kuti kana munhu achirwara akanwa mushonga kana mapiritsi anoshaya simba rekupedza chirwere izvo zvinozivikanwa muchirungu nekunzi anti-microbial resistance.
Sangano rinoona nezveutano pasi rose reWorld Health Organisation (WHO) rinoti anti-microbial resistance inokonzerwa zvakare nekusatorwa zvakanaka kwemishonga yekurapisa zvirwere zvakasiyana.
Ibasa remunhu wose kurwisa dambudziko rekutorwa kwezvinodhaka zvisingatenderwe mumuviri, zvikuru nevechidiki sezvo vari ivo vatungamiriri venyika vemangwana.