Ngatifarei asi Covid-19 ichiriko
ZIMBABWE nemusi weChishanu svondo rino kusvika Muvhuro unotevera ichabatana nedzimwe nyika dzepasi rose dzine vatendi vechiKritsu mukupemberera zororo rePasika.
Gore rino, zororo iri rabva rabatana zvakare nemhemberero dzekuwana kwenyika ino kuzvitonga kuzere (18 Kubvumbi).
Semakore ose, veruzhinji vanenge vaine zvirongwa zvakasiyana-siyana panguva yezororo iri apo vamwe vanoungana nehama neshamwari vachiita mitambo nemhemberero dzakasiyana.
Panguva iyi zvakare, vanhu vakawanda vanofamba nzendo izvowo zvinoita kuti tsaona dzemumigwagwa dziwande.
Zimbabwe, sedzimwe nyika pasi rose, pari zvino iri mushishi yekurwisa chirwere cheCovid-19. Chirwere ichi chichirimo munyika muno uye chiri kupararira izvo zvinoonekwa nevanhu vatsva vari kuwanikwa vaine denda iri mushure mekuvhenekwa pamwe nevari kufa.
Zvakakosha kuti apo veruzhinji pavanenge vachipemberera zororo rePaseka nerekuwana kweZimbabwe kuzvitonga kuzere, varambe vachitevedzera matanho akatarwa nesangano reWorld Health Organisation (WHO) neHurumende ekudzivirira kupararira kwedenda iri.
Matanho aya anosanganisira kupfeka mamasiki nenzira kwayo yekuvhara muromo nemhuno apo vanhu vanenge vari panzvimbo dzinosangana veruzhinji, kushambidza maoko nemvura nesipo kana kushandisa sanitizer uye kusaita chitsokotsoko.
Kune vanhu vakawanda vanotora mukana wezororo rakadai kuungana kungave kumachechi kana semhuri uye chakakosha kutevedzera matanho ekudzivirira kupararira kwedenda iri.
Kana vanhu vakashaya hanya nekuzvidzivirira kubva kuchirwere ichi, pane njodzi huru yekuti chinogona kunyuka kechishanu.
Hurumende yakanyevenutsa matanho ekurwisa kupararira kwechirwere cheCovid-19 zvichitevera kudzikira kwehuwandu hevanhu vari kubatwa uye kufa nedenda iri. Asi kana vanhu vakarivara, chirwere ichi chinonyuka zvakare. Gore rapera, veruzhinji vakapemberera zororo rePasika pasi pematanho akasimba ekurwisa chirwere ichi apo vanhu vaiungana vaisatenderwa kudarika 50. Izvi zvakaona mamwe machechi achiita zvirongwa zvepadandemutande nechinangwa chekuti vatendi vavo vakwanise kubatirana nevamwe mukupemberera zororo iri.
Kazhinji, chirwere cheCovid-19 chinonyuka patsva kana pakave nekufamba-famba kwakanyanya kwevanhu, zvikuru munguva yezororo rakadai.
Mamiriro ezvinhu aya anoreva kuti ibasa remunhu wose kuzvidzivirira kubva kudenda iri.
Zvakakoshawo kuziva kuti zororo rakadai rinouya richidarika uye upenyu hunofanira kuenderera mberi nekudaro utano ngahuchengetedzwe. Kune vamwe zvakare vanoda kutora mukana wakadai kufarisa vachipedzisira vapinda muna taisireva.
Saka zvakanaka kuti munhu ati fare-fare tindike nekuti ukaona kangoma kave kuririsa kanenge koda kuparuka.
Kune vedzimotokari, kurudziro ndeyekuti vatevedzere mitemo yemumigwagwa nechinangwa chekudzivirira tsaona.
Makore ose, panguva yezororo rakadai panoitika tsaona dzemumigwagwa dzakawanda apo vanhu vanofa pamwe nekukuvara.
Asi, zhinji dzetsaona idzi dzinokwanisa kudzivirirwa kana vatyairi vakatevedza zvinodiwa pakufamba mumigwagwa.
Chishuwo chikuru ndechekuti veruzhinji vave nePasika yakaropafadzwa pamwe nezororo rekuwana kwenyika kuzvitonga kuzere rakanaka.