Muporofita abata chibharo pasowe
MUPOROFITA wechechi yeJohane Masowe weChishanu ane mukurumbira kuShamva, kudunhu reMashonaland Central anonzi akasungwa nemapurisa eko nemhosva yekubata chibharo musikana wechidiki achimunyepera kuti aimubvisa munyama wekuti azoroorwa zvakanaka.
Mutauriri wemapurisa kuMashonaland Central, Inspector Milton Mundembe, vanoti nyaya iyi yakaitika nemusi wa26 Kurume kukomboni yeMindchang kuShamva.
“Tine nyaya yemuporofita wenhema anonzi ane mukurumbira kuShamva, Madzibaba Onias Katengu (44), uyo akasungwa nenyaya yaari kupomerwa yekubata mwanasikana wechidiki chibharo. Tichitaura kudai, ari kubatsira mapurisa mukuferefetwa kwenyaya iyi,” vanodaro Insp Mundembe. Vanoti musikana uyu akaperekedzwa nababa vake kumba kwemuporofita uyu vachida kunobatsirwa zvaivanetsa mukurarama kwavo.
“Musikana uyu anonzi mumwedzi waKukadzi gore rino, aimbenge amboenda kumuporofita uyu uko akanotaurirwa kuti aiva nemweya yaimutevera yaizokonzera kuti kuroorwa kwake kunetse uyewo nekuti kunyange akaroorwa, imba yake yaisazomira zvakanaka,” vanodaro Insp Mundembe.
Vanoti pakazodzokera musikana uyu nababa vake, vakaporofitwa zvakasiyana vakapihwa miteuro mumwe nemumwe wavo.
“Baba vakapihwa muteuro wavo uyu musikana ndokupihwa mvura yaiva yakasanganiswa nepepa jena nedota akanzi anogeza mvura iyi uye akakomekedzwa kuti asazotaurira baba vake zvose zvaachazosangana nazvo kunyange nemashoko aibva kumuporofita uyu,” vanodaro Insp Mundembe. Muporofita uyu anonzi akazotaurira musikana uyu kuti adzoke oga kumba kwake zuva rimwe chete iri nenguva dza3 masikati apo musikana uyu akazodzoka nekahanzvadzi kake.
“Musikana uyu adzoka, vakazoenda kumasowe kwemuporofita uyu chinhambwe chinoita mamita 200 kubva pamba pemuporofita. Ipapo akasvikotanga kupfungaidzwa nemarasha aiva akaiswa murwenga achinatiriswa, akazonzi abvise chipfeko chake chemukati achinzi aida kubviswa mhepo,” vanodaro Insp Mundembe.
Anonzi ndipo paakamubata chibharo.
“Musikana uyu akaridza mhere akamupakira machira mumuromo,” vanodaro Insp Mundembe.
Musikana uyu anonzi akazokwanisa kutiza pasowe apa achibva aenda kunozivisa tete vake nyaya iyi ndokumhan’arwa kumapurisa.
“Madzibaba Onias Katengu akabva asungwa, musikana uyu ndokuendeswa kuchipatara kunoongororwa. Nyaya iyi iri kufambira mberi nekuferefetwa apo muporofita uyu akachengetedzwa uye anotarisirwa kuenda kumatare edzimhosva munguva pfupi iri kutevera,” vanodaro Insp Mundembe. Vanokurudzira veruzhinji kuti vasavimbe nemaporofita ose-ose vachiti kwawanda maporofita enhema.
“Tine nyaya dzevanhukadzi vari kubatwa chibharo nemaporofita dzakawanda munyika uyewo vanasikana nemadzimai tinoti kana vachinobatsirwa nemaporofita echirume ngavaende nevarume vavo kana hanzvadzi kana dzimwe hama dzechirume. Musavhundutsirwe kuti kune mimwe miteuro isingade kuzivikanwa nevamwe vanhu kana hama dzenyu, ndipo panotangira chitsotsi chacho chose,” vanodaro Insp Mundembe.