MBAVHA DZEMOMBE DZAIGOCHERA PAUTSI: MITAMBO
CAPS United inoti nhubu dzakakonzeresa mhirizhonga kunhandare yeMandava, kuZvishavane svondo radarika izvo zvakazoita kuti mutambo wechikwata ichi neFC Platinum utadze kupera zvakanaka dzinofanirwa kurangwa zvakaomarara.
Izvi zviri kuuya panguva iyo Kepe-kepe kana kuti Green Machine yashevedzwa kuti igomira pamberi pekomiti yePremier Soccer League (PSL) Disciplinary Committee apo iri kupomerwa mhosva yekutadza kudzivisa vatsigiri vayo kuti vasaite mhirizhonga pamutambo uyu.
Komiti inotonga nekuranga vanorasa hunhu yePSL Disciplinary Committee iri kutarisirwa kugara pasi neCAPS United musi wa23 Kubvumbi.
Zvakadai, administrative manager weCAPS United – Morton Dodzo – anoti chikwata chavo chiri kushushikana zvikuru nemhirizhonga yakakonzerwa nevatsigiri vavo.
Vatsigiri ava vakapinda munhandare vachidya magaka mambishi mushure mekunge chikwata chavo charambirwa chibodzwa chavainge vanwisa apo mutambo wavo neFC Platinum wainge wasarirwa nemaminitsi mana kuti uchipera.
Izvi zvakaona varidzi vepembe vachitiza kubuda munhandare vachityira hupenyu hwavo zvakakonzera kuti mutambo uyu umiswe.
“Isu sechikwata hatisi kufara, tiri kunzwa kusvoda chaizvo nezvakaitwa nevatsigiri vedu kuMandava svondo radarika.
“Hatidi mhirizhonga nekuti inosvibisa nhabvu yedu, zvinotisvibisa sechikwata. Zvinodzingawo vakotsveri vanenge vachida kudira mari munhabvu yedu.
“Nhabvu yagara ndiwo mutambo mukuru pasi rese saka naizvozvo tinofanirwa kuita hunhu hwakanaka kwete kuita mhirizhonga nekuti hakuna kwazvinotisvitsa,” anodaro Dodzo.
Anoenderera mberi achiti: “Mumazuva ari kutevera tiri kuita musangano nehutungamiri hwevatsigiri vedu avo tinoda kushanda navo kuti titsvage nhubu dzakakonzeresa mhirizhonga kuMandava.
“Vanhu ivava tikavaziva tinoda kuvaendesa kumapurisa tosiya mapurisa aite basa ravo. Tinoda kuti vanhu ava vagopupura kune vamwe kuti mhirizhonga haiitwe kunhabvu, vachapupura uye hatidi kuvaona