‘Zim yosimudzira vatori venhau’
HURUMENDE yeSecond Republic yakazvipira kusimudzira mashandiro akanaka evatori venhau izvo zviri kuona vachishanda vakasunguka uye vakachengetedzeka, vanodaro gurukota rezvekuburitswa kwemashoko nenyaya dzenhepfenyuro, Dr Jenfan Muswere. Mumashoko avo ekucherechedza zuva guru reWorld Press Freedom Day, Dr Muswere vanoti Hurumende iri kusimudzira mashandiro evatori venhau nenzira dzinosanganisira kubvisa mitemo inovakanganisa mukuita basa ravo.
Zuva iri rinocherechedza nemusi wa3 Kubvumbi gore rega-rega.
“Hurumende yeSecond Republic, ichitungamirirwa naHis Excellency President Dr E.D Mnangagwa, yaita budiriro huru mukusimidzira chikamu chezvenhau nekuona kuti chiri kushanda zvakasununguka uye munharaunda yakachengetedzeka. Izvi zvaitwa kuburikidza nekukumikidzwa kwemitemo inosimudzira mashandiro akanaka uye nekubviswa kwemitemo inokanganisa mashandiro yakadai seAccess to Information and Protection of Privacy
Act (AIPPA).
“Izvi zvaona pachive nenhepfenyuro nezviteshi zvematerevhizheni zvitsva zvichiita kuti pave nezvakasiyana-siyana izvo zvinoenderana nemafungiro aHis Excellency President Dr E.D Mnangagwa ekuti hapana munhu kana nzvimbo inofanirwa kusarira kumashure,” vanodaro Dr Muswere.
Vanoti apo pasi rose riri kupemberera zuva guru reWorld Freedom Press Day, vanovimbisa veruzhinji kuti Hurumende icharamba ichisimudzira mashandiro akanaka emasangano enhau kuburikidza nehurukuro. Dr Muswere vanoti dingindira remhemberero idzi regore rino, iro rinokoshesa chikamu chezvekutora nhau uye kodzero yekutaura vanhu vakasununguka, rinoenderana nezviri kuitika pasi rose.
“Rinoratidzawo kukosha kwemasangano enhau mukuwana mashoko nekuafambisa,” vanodaro.