Mark By die Wildskosfees buite Bloem wag 80 geregte waaraan jy kan weglê
Een keer per jaar ruk ’n paar duisend mense op na die Wildskosfees op De Oude Kraal suid van Bloemfontein. Hulle het net een doel voor oë: om hulle wildsvleislus en dors te blus.
Nie weer nie, het Gerhard en Marie Lombard, eienaars van De Oude Kraal, besluit nadat hulle 16 jaar gelede die eerste Wildskosfees op hulle gasteplaas gehou het.
“Daar het net 30 mense opgedaag,” onthou Gerhard. “Ons het maar ingegee toe ons vriende mooi vra om dit weer te hou.”
In 2014 het ’n aks meer as 3 000 mense van reg oor die land aan die Lombards se wildsgeregte kom weglê. Daar was 18 verskillende soorte wild te proe en sowat 80 verskillende geregte om van te kies: springbok, takbok, ribbok, blouwildebees, vlakvark, ystervark, krokodil... en jy kon proe aan enigiets van haaspastei, springboktongetjies, bosvarkpasteitjies, vlakvark
wors, blouwildebeeswors, ribbokboud en takbok-blindevinkies tot koedoesosaties, afval en pofadders (vetderm gestop met lewer en niertjies).
Elke liewe gereg word deur Marie berei en dit neem haar en haar span mense drie maande om alles agtermekaar te kry.
“Die oumense het wildsvleis ’n slegte naam – of eerder: ’n slegte smaak – gegee. Hulle het die vleis in asyn en rooiwyn geweek en dan het dit suur gesmaak. Room, melk en karringmelk werk byvoorbeeld goed om die wildsvleis se geur te versag. My ander geheim is witpeper.”
Marie vertel verder hulle gebruik slegs vroulike diere wat met ’n skoon kopskoot doodgemaak is. Die diere moet geskiet word terwyl hulle rustig is, en hulle moenie rondgejaag word nie. Dan hang hulle die karkasse in die vel op om te rus. Drie weke lank. Dit word nie deur die hakskeensening gehaak nie, maar met toue aan die been vasgemaak. “Dit alles sorg dat die gehalte van die vleis beter is,” verduidelik Marie.
Hoewel dié eiesoortige fees in die hart van die winter in die hart van die Vrystaat gehou word, is daar oorgenoeg dinge wat besoekers warm hou. Oral brand vure en daar is berge hout wat dit aan die gang gaan hou tot ounag toe. Jy skuiwe van kraampie tot kraampie en eet die een wildskoslekkerny ná die ander. Vars gebraai. En omdat so ’n vleisetery ’n mens lekker dors maak, is daar ’n hele klomp van ons land se beste wyne te proe en koop.
As jy steeds koud kry, dan stap jy oor na die koedoedrolspoegbaan. Hier >
kan jy kyk hoe ver jy so ’n koedoekuttel gespoeg kry. Maar eers vat jy ’n skoot mampoer. Hy warm dan ’n slag alles goed op. Ruan du Preez spoeg sy kuttel skaars 2 m ver. “Nee hel,” kla hy, “daai mampoer het my asem weggeslaan.”
’n Trekker met ’n sleepwa ry groepe mense deur die veld rond. ’n Helikopter vlieg ander weer so ’n lekker wye draai oor die plaas. Daar word kleiduif en teiken geskiet, perdgery en selfs gholfballe geslaan. Dis ’n plaaskuier met baie gees. Wanneer die son in die weste wegduik, word ’n tamaai grootskermtelevisie aangesit. Hier eet hulle immers nie net springbok nie; hulle kyk ook graag hoe hulle speel.
De Oude Kraal deoudekraal.com
051 564 0636/733