ZENE KAYE SOAPS FROM CHARDINE Kaapstad
Zene wou altyd haar eie besigheid begin en het in ’n Google-soektog na ’n resep vir badsout toevallig op ’n webwerf oor bokmelkseep afgekom. Sy het ontdek bokmelkseep kan wondere verrig vir mense met ekseem, psoriase en ’n sensitiewe vel, en omdat sy self met ekseem op haar hande gesukkel het, het sy besluit om self dié seep te maak en te kyk of dit werk.
“Ek het Youtube-video’s gekyk en die rou materiale gekoop, maar my eerste drie pogings het misluk. Ses maande van trial en error het my geleer verskillende olies hou verskillende voordele in: druiwepit- en amandelolie bevogtig byvoorbeeld die vel baie goed, terwyl kasterolie uitstekend skuim. Ek het ook navorsing gedoen oor die voordele van natuurlike soorte klei en vlugtige olies, en gebruik dit in baie van my produkte.”
Is seepmaak ’n lonende besigheid? Ja, maar ek hou ook daarvan om mense met velprobleme te help. Seepmaak is harde werk, jy bring ure op jou voete deur en jy moet konsentreer, want ’n klein foutjie kan jou baie geld kos. Ek het steeds ’n voltydse werk, maar my doelwit is om voltyds seep te maak. Wat maak jou produkte uniek? Alles – van die seep, vloeibare seep, badmelk, sjampoe en opknapper tot die lipbalm en gesig- en lyfroom – bevat die een of ander vorm van bokmelk (vars of poeiermelk). Bokmelk is strelend en voedsaam omdat dit dieselfde ph het as die mens se vel – dit bevat ook vitamien A, aminosure, proteïen en melksuur, wat ’n natuurlike afskilferaar is. Grootste wanopvattings? As jy behoorlik navorsing doen en die basiese veiligheidsmaatreëls nakom, is seepmaak glad nie so gevaarlik of moeilik soos wat baie mense dink nie. Wat my wel verras het, is watter belangrike rol temperatuur in die proses speel: As ek byvoorbeeld my melk- en oliemengsel bymekaarvoeg, móét dit dieselfde temperatuur wees sodat die nodige chemiese reaksies kan plaasvind. Party olies kan ook die mengsel laat oorverhit en skei.
Topwenke
• Doen navorsing: Daar is baie inligting op die internet oor die seepmaakproses, en forums waar jy kan raad vra. • Seepmaak is ’n natuurlike proses – moenie dit probeer afjaag nie. • Byt vas en probeer weer – baie dinge loop verkeerd aan die begin, maar ’n mens leer gou.
soapsfrom chardine.co.za 021 913 6118 info@soaps fromchardine. co.za