Die kombuis en leefvertrek

Kombuiswasbak Sorg dat daar skottelgoedwasseep, ’n skuursponsie en minstens twee jammerlappies en afdroogdoeke (van elk, ja) is.

Stoof Eerste keuse is ’n gewone grootte stoof met gasplate en ’n elektriese oond, maar ’n tweeplaatstofie met ’n oond sal ook deug, veral as daar ’n mikrogolfoond is.

Mikrogolf Dis nie noodsaaklik nie, maar gaste wil dalk gisteraand se oorskietwors of ’n pastei of ’n bietjie melk vir koffie of ontbyt warm maak. Kies ’n eenvoudige, basiese model – hoe ingewikkelder en slimmer die knoppies, hoe groter die kans dat hy gebreek gaan word.

Koffie, tee, melk en suiker Sorg dat daar genoeg Ceylon- en rooibostee (plus ’n teepot), kits- en moerkoffie (met ’n ordentlike dompelpot), suiker (en kunsmatige versoeter) en melk is. Bly weg van daardie lawwe strooitjies kitskoffie en driehoekies langlewemelk – dis altyd te min, dit mors en dis dikwels verby die vervaldatum omdat niemand dit wil gebruik nie!

Yskas ’n Kroegyskas met ’n werkende vrieshokkie (en ysbakkies) is goed en gaaf vir ’n langnaweek, maar ’n groter yskas is beter. Verras jou gaste gerus met ’n sakkie ys in die vrieshokkie.

Ketel Koordloos is koning, of kry ’n platboomketel as jy ’n gasstoof het – g’n mens wil elke keer die elektriese prop uit die muur trek net om die ketel vol water te maak nie.

Sit- en eetplek Die tafel moet groot genoeg wees sodat al die gaste gemaklik kan aansit om te eet. Dis ook lekker vir iemand wat dalk op ’n skootrekenaar moet werk. ’n Rusbank met gemaklike leunstoele sal waardeer word – en moenie alles met strooikussings toepak nie!