Top 10-watertuinplante
Dié 10 inheemse staatmakers sal goed vaar in ’n watertuin wat genoeg son kry.
Wit aronskelk
Zantedeschia aethiopica ’n Outydse gunsteling in die tuin met blinkgroen pylvormige blare van tot 50 cm en sneeuwit blomme in die lente. Kan matige ryp tot -6 °C verdra. (Die spesie op die foto is Zantedeschia aethiopica “Green Goddess”.)
Papegaaigladiolus
Gladiolus dalenii Dié plant, wat tot 1 m hoog groei met oranje blomme in die somer, het volson nodig om behoorlik te blom. Verdra swaar ryp (-10 °C).
Rivierlelie
Hesperantha coccinea of Schizostylis coccinea ’n Half-immergroen meerjarige wat tot 50 x 25 cm groei, met pragtige karmosynrooi tot pienk of wit blomme in die somer en herfs. Verdra swaar ryp (-10 °C).
Oranjerivierlelie
Crinum bulbispermum ’n Groot bolplant van tot 1 m hoog, met gryserige geboë blare en groot pienk-en-wit gestreepte lelieagtige blomme in die vroeë somer. Dit het volson nodig en rus in die winter. Verdra swaar ryp (-10 °C). >
Meer as 50% van Suid-afrika se natuurlike vleie is vernietig deur ontwikkeling.
5Rivierpampoen
Gunnera perpensa Dié meerjarige sterk krui van 0,6 x 1 m het blougroen sambreelvormige blare en verdra swaar ryp (-10 °C).
8
Papirus
Cyperus Die bekendstes is die 2 m hoë Cyperus papyrus en die dwergweergawe op die foto, Cyperus papyrus “Nana”. Daar is ook ander kleiner spesies, soos die 1,5 m hoë Cyperus textilis, 1 m hoë Cyperus alternifolius en 1 m hoë Cyperus prolifer. Hulle verkies son tot halfskaduwee en kan ryp tot -5 °C verdra.
Biesies
Juncus
Die gewone biesie ( Juncus effusus) vorm ’n aantreklike pol van tot 1 m hoog, het donkergroen stingels en verdra kwaai ryp. Die kurktrekkerbiesie ( Juncus effusus “Spiralis”) het ongewone krullerige stingels.
Rivierster
Gomphostigma virgatum ’n Immergroen meerjarige struik wat tot 2,6 m hoog kan word, met fyn silwergrys blaartjies en klein wit blommetjies heeljaar deur. Verdra swaar ryp (-10 °C).
Rooiknol
Wachendorfia thyrsiflora ’n Immergroen plant met geplooide groen blare en treffende geel blomare in die lente en vroeë somer. Dit word tot 2 m hoog en kan matige ryp (tot -6 °C) verdra.
Kaapse riete
Twee wat ryp tot -8 °C verdra, is die Kaapse dekriet ( Elegia tectorum), wat 0,6-1,2 m hoog word, en Elegia tectorum ‘Fish Hoek’. Hulle het dieselfde spreiwydte, blaarvorm en bruin bloeiwyses, maar die ‘Fish Hoek’ is op 60 cm heelwat korter. Beskerm dit met ’n deklaag in die winter. Blombessie ( Elegia cuspidata) groei 0,5-1 m hoog, vorm digte polle regop, dun stingels, en verdra matige ryp. Calopsis ( Calopsis paniculata), wat 2 x 1 m word, het veeragtige, heldergroen blare en verdra ligte ryp.