Bros eiervrug met tamatie-sugo
Genoeg vir 4 Bereidingstyd 10 minute plus rustyd Gaarmaaktyd 30 minute
Dié ligter variasie van die klassieke melanzane parmigiana (parmesaan-eiervrug) is heerlik vir die somer. Vir ’n ryker weergawe verdubbel die resep en bak die gebraaide eiervrugskywe in lae met gerasperde mozzarellakaas en die tamatiesous, amper soos ’n lasagne.
Jy benodig
• growwesout
• 1-2 eiervrugte, in skywe van 1 cm
dik gesny
• ½ koppie (125 ml) meel
• 1 teelepel (5 ml) swartpeper
• 2 teelepels (10 ml) sout
• 2 eiers
• 2 koppies (500 ml) bros broodkrummels
• 4 eetlepels (60 ml) vars origanum, gekap
• ¾ koppie (180 ml) gerasperde
parmesaankaas
• olyfolie
• 2 koppies (500 ml) tamatie-sugo
(sien resep hiernaas)
• 1 bol fior di latte (vars mozzarella)
• ’n handvol vars basilie
Só maak jy
Sprinkel 1 teelepel growwesout oor die eiervrugskywe en laat dit vir 40 minute in ’n vergiettes dreineer. Moenie dié stap uitlos nie – dis belangrik vir ’n bros eindresultaat. Druk dan die skywe baie goed droog met kombuispapier. Voorverhit die oond tot 210 °C en sit solank ’n groot bakplaat op die middelste oondrak om warm te raak. Gooi die meel, peper en 1 teelepel sout in ’n plastieksak en skud ’n paar van die eiervrugskywe op ’n slag daarin rond. Klits die eiers in ’n plat bak en meng dan die broodkrummels, origanum en parmesaan met 1 teelepel sout in ’n ander plat bak. Doop die eiervrug eers in die eier, laat die oortollige eier afdrup, en druk dit dan in die krummelmengsel. Haal die warm bakplaat versigtig uit die oond en sprinkel ongeveer 3 eetlepels olyfolie daaroor. Pak die eiervrug vinnig in ’n enkellaag daarop en sit dit vir 15-20 minute in die oond. Draai die skywe om, sprinkel nog ’n bietjie olyfolie oor, en bak dit vir nog ongeveer 10 minute totdat die skywe goudbruin en bros is. Sit dadelik ’n bord vol bros eiervrugskywe voor met skywe mozzarella, vars basilie en warm tamatie-sugo.