Sondroogtamatieskons Maak 8 skons Bereidingstyd 20 minute Gaarmaaktyd 20 minute
Hierdie ryk, geurige skons is ’n heerlike soutige happie as daar onverwags gaste voor jou deur staan. Jy kan ook ander gerasperde kaas van jou keuse gebruik – soos pecorino of beleë cheddar. Sorg net dat dit ’n sterkerige kaas is.
Jy benodig
• ½ koppie (125 ml) sondroogtamaties
• 1 teelepel (5 ml) elk gekapte vars
roosmaryn en origanum
• 1½ koppies (375 ml) fyngerasperde
gruyèrekaas
• 280 ml karringmelk
• 1 eetlepel (15 ml) dijonmosterd
• 3½ koppies (875 ml) koekmeel
• ½ teelepel (2,5 ml) sout
• 1 eetlepel (15 ml) paprika
• 1 teelepel (5 ml) koeksoda
Só maak jy
Voorverhit die oond tot 220 °C. Pols die helfte van die sondroogtamatie tot ’n puree en kap die ander helfte baie fyn. Meng al die nat bestanddele saam en sif dan die droë bestanddele daaroor. Roer dit met ’n houtlepel tot net-net gemeng en werk dit dan verder met die hand tot ’n sagte deeg. ( Voeg 1-2 eetlepels melk by as die mengsel te styf is.) Keer die mengsel uit op ’n meelbestrooide oppervlak en druk dit platter totdat jy ’n sirkel met ’n deursnee van 22 cm het. Sny die deeg in 8 stukke of druk vorms uit. Pak die skons op ’n gesmeerde bakplaat en bak dit vir 10 minute. Verlaag dan die oond se temperatuur tot 180 °C sonder om die deur oop te maak, en bak dit vir nog 15 minute.
Pure platteland
Oonde verskil. Toets een van die skons – indien dit nog nie deurgaar is nie, bak dit vir nog 5-10 minute. Sit dit dadelik – nog vuurwarm – voor met botter, soet rissiekonfyt en kaas.